Հայաստանում կոռուպցիան համակարգային չէ, բայց համատարած է

Հայաստանի վարչապետի պաշտոնը զբաղեցնող Նիկոլ Փաշինյանը նախօրեին կայացած իր ասուլիսում հայտարարում է. «Համակարգային կոռուպցիան Հայաստանում չկա, պնդում, թե ավելացել են կոռուպցիոն բացահայտումները»։

Իրավապաշտպանները, սակայն, Փաշինյանի հետ համակարծիք չեն, ավելին, նշում են, որ համակարգային կոռուպցիա, ինչպես 2018 թվականի իշխանափոխությունից առաջ էր՝ չկա, սակայն կա համատարած կոռուպցիա, ընդհուպ մինչև պետական ամենաբարձր օղակներում։

«Իրազեկ քաղաքացիաների միավորման» ղեկավար Դանիել Իոնիսյանը մի շարք փաստարկներ է ներկայացրել, որ հակակոռուպցիոն դատարանի նախագահ է ընտրվում մարդ, ով հարյուրավոր օրեր կեղծ գործուղումների է գնացել, բյուջեի փողը ստացել է, հետո այդ գումարը վերադարձրել է, իսկ նրան դատելու փոխարեն նշանակում են հակակոռուպցիոն դատարանի նախագահ։

Կոռուպցիոն ոչ պակաս ծանր դրսևորում է նաև Սուրեն Պապիկյանի բնակարանի հետ կապված դեպքը, երբ պարզվել էր, որ նա 69 միլիոն դրամով մեծ բնակարան էր գնել կառուցվող շինությունում, իսկ այժմ դրա շուկայական արժեքը հասել է գրեթե 169 միլիոն դրամի։

Ըստ Իոնիսյանի՝ Սուրեն Պապիկյանի 50-ից 100 միլիոն դրամի զեղչ է արվել բնակարանի մեջ, մինչդեռ որևէ մեկին, այդ թվում լրագրողներին, կամ այլ շարքային քաղաքացիների, որևէ բնակարանի մեջ երբևէ զեղչ չեն անի, իսկ սա կոռուպցիոն դրսևորում է։ Չնայած Փաշինյանը իր ասուլիսում փորձում էր չքմեղանալ, ավելին՝ հորդորում էր լրագրողներին 300 հազար դոլարով գնել Սուրեն Պապիկյանի արդեն 420 հազար դոլար արժողությամբ տունը, վստահաբար կարելի է փաստել, որ Հայաստանում կոռուպցիան այդպես էլ արմատախիլ չի արվել, իսկ «հեղափոխական» թիմը իշխանության գալուց հետո ինքն է սերտաճել բյուրոկրատական ապարատի հետ, աստիճանաբար սովորում է կոռուպցիայի բոլոր ելևէջները և շատ կարճ ժամանակահատվածում գերազանցելու է նախկիններին, որքան էլ Փաշինյանը անմեղ տեսք ընդունի և փորձի հակառակի մեջ համոզել մարդկանց։

Նոնա Ավագյան