Ալեքսանդր Ռահրը խոսել է Հարավային Կովկասում Արեւմուտքի «Կարմիր գծի» մասին
ՎԵՐԼՈՒԾՈՒԹՅՈՒՆՆԵՐ
Արեւմուտքի համար «կարմիր գիծը» Հարավային Կովկասում ռազմական գործողությունների վերսկսումն է, իսկական պատերազմ։ Այս մասին «Ուժի գործոն» հաղորդաշարի շրջանակներում NEWS.am-ի թղթակցի հետ զրույցում ասաց գերմանացի քաղաքագետ Ալեքսանդր Ռահրը։
«Այդ դեպքում Արեւմուտքը կփորձի այլ մեթոդներով ազդել իրավիճակի վրա», - ասաց նա։
Փորձագետը կարծում է, որ երեք տարի առաջ Ադրբեջանի եւ Հայաստանի միջեւ Լեռնային Ղարաբաղի շուրջ պատերազմի վերջանալու հարցում գերակա դեր ուներ Ռուսաստանը, եւ ամբողջ աշխարհը Ռուսաստանին ճանաչում էր որպես կայունացնող հիմնական դերակատար այս տարածաշրջանում, սակայն այսօր այդ դերից ոչինչ չի մնացել։ Ավելին, Ռուսաստանը կորցնում է իր ազդեցությունը մերձավոր արտասահմանում, ինչը կապված է Ուկրաինայում ռազմական գործողությունների եւ Արեւմուտքից մեկուսացվելու հետ։
«Ադրբեջանը սկսում է հաղթել այն առումով, որ դա անհրաժեշտ է դառնում Ռուսաստանին, քանի որ Ռուսաստանի Դաշնությունը չի ցանկանում, որ Ադրբեջանը, որտեղ գտնվում են Եվրոպայի համար կարեւոր ռեսուրսները, ամբողջությամբ դեպի Արեւմուտք գնա։ Ռուսաստանը ցանկացած դեպքում համաձայնության կգա Ադրբեջանի հետ գազի, նավթի ու քաղաքականության հարցում։ Նույն պատճառներով Ադրբեջանը շատ կարեւոր է Եվրամիության համար՝ որպես ռուսական մատակարարումների այլընտրանք։ Ուստի այսօր ԵՄ-ն պատրաստ է աչք փակել շատ բաների վրա, ինչը նախկինում չի արել», - ընդգծեց Ռահրը։
Նա հավելեց, որ Եվրոպան այսօր ԱՄՆ-ի աջակցությամբ ակտիվանում է տարածաշրջանում, որպեսզի նվազեցնի Ռուսաստանի ազդեցությունը եւ փորձի ամրապնդվել Ռուսաստանի Դաշնության եւ Չինաստանի դեմ։
«Սակայն միեւնույն ժամանակ Եվրոպան ազդում է նրա վրա, որ Թուրքիայի եւ Հայաստանի սահմանը սկսի բացվել, որպեսզի Հայաստանը դուրս գա մեկուսացումից։ Բայց իրականում նպատակն այն է, որ Հայաստանը դուրս գա Ռուսաստանի ուղեծրից եւ սկսի մոտենալ Արեւմուտքին», - եզրափակեց քաղաքագետը։
