Արսեն Թորոսյանի հարցով դատախազը կմտնի խորհրդարան

Գլխավոր դատախազ Աննա Վարդապետյանն առաջիկայում մտնելու է խորհրդարան ևս մեկ պատգամավորի՝ քրեական պատասխանատվության ենթարկելու թույլտվություն ստանալու միջնորդությամբ։

Խնդիրը, սակայն, այս անգամ ընդդիմությունը չէ, իշխանությունը որոշել է պատժել իր իսկ ներկայացուցիչներից մեկին։ Առողջապահության նախկին նախարար Արսեն Թորոսյանն է թիրախում։ Հիշեցնենք՝ շաբաթներ առաջ հայտարարեց, թե քրեական գործ է հարուցվել կորոնավիրուսի համավարակի օրերին իրականացված չարաշահումների փաստով, ընդ որում քրեական գործով անցնող երկու հիմնական անձինք առողջապահության նախկին և ներկա նախարարներն են։ Եթե Անահիտ Ավանեսյանին հաջողվել է առայժմ իր վրայից հեռացնել սլաքները, ապա Թորոսյանը սեփական կուսակիցների թիրախում է։ Թերևս հենց այս հանգամանքով է պայմանավորված, որ Թորոսյանը վերջին շրջանում բավականին կոշտ հայտարարություններ է անում Անահիտ Ավանեսյանի նկատմամբ։

Մեր աղբյուրի փոխանցմամբ՝ նա նույնիսկ իր նախկին տեղակալին խնդրել է վերացնել չարաշահումների որոշ հետքեր նախարարությունում, սակայն Ավանեսյանը ոչ միայն չի կատարել Արսեն Թորոսյանի խնդրանքը, այլ նույնիսկ ինքն է մի շարք փաստաթղթեր փոխանցել նախաքննական մարմնին։

Թորոսյանը նաև չի կարողանում լեզու գտնել ո՛չ Նիկոլ Փաշինյանի , ո՛չ էլ սեփական կուսակիցների հետ։ Փաշինյանն ընդհանրապես չի ցանկանում լսել Թորոսյանի պարզաբանումները, իսկ «Քաղաքացիական պայմանագրի» պատգամավորները միայն ուրախության ձեռքերն են շփում։

Մեր աղբյուրի փոխանցմամբ՝ Վարդապետյանի՝ Ազգային ժողով մտնելու դեպքում, «Քաղպայմանագիրը» գրեթե ամբողջ կազմով կողմ է քվեարկելու Արսեն Թորոսյանի դեմ քրեական հետապնդում հարուցելու միջնորդությանը, հատկապես «Քաղպայմանագրի» վարչության ընտրություններից հետո Թորոսյանը դարձել է ՔՊ աչքի գրողը, թեև մինչ այդ էլ առանձնապես լավ հարաբերություններ չուներ խմբակցության ներկայացուցիչների հետ։

Էլեն Մարգարյան