ՔՊ-ում չեն կարողանում օմբուդսմենի թեկնածու գտնել

Այսօր մեկնարկել է Ազգային ժողովի հերթական նստաշրջանիը։ Երեկ ուշ երեկոյան «Քաղաքացիական պայմանագիր» խմբակցության պատգամավորները հավաքվել են կուսակցության գրասենյակում, որտեղ հանդիպում է կայացել վարչապետի պաշտոնը զբաղեցնող նիկոլ Փաշինյանի հետ։ Քննարկել են խորհրդարանի աշխատանքի հետ կապված հարցեր՝ այդ թվում ընդդիմության մի շարք նախաձեռնությունները ձախողելու ուղղությամբ։ Ամենաառանցքային հարցը, որ քննարկվել է Մարդու իրավունքների պաշտպանի նոր թեկնածու առաջադրելն է։ 

Մեր աղբյուրի փոխանցմամբ՝ Փաշինյանը հայտնել է, թե առայժմ որևէ հայտնի և իշխանության նկատմամբ լոյալ իրավաբանի չի կարողացել համոզել զբաղեցնել այդ խնդրահարույց պաշտոնը, որը արդեն ամսից ավելի թափուր է մնացել Քրիստինե Գրիգորյանի հրաժարականից հետո։ Փաշինյանը նշել է, որ մեկ երկու օրվա ընթացքում վերջնականապես կկողմնորոշվի օմբուսդմենի թեկնածության հարցով, սակայն չի բացառել, որ թեկնածու առաջադրել հենց խմբակցության կազմից, ուստի և ինչպես նշել էր մեր լրատվամիջոցն ավելի վաղ, ՔՊ-ում քննարկվող երկու թեկնածուներին՝ Հերիքնազ Տիգրանյանին և Արուսյակ Ջուլհակյանին հայտնել է, որ կարող են նրանցից որևէ մեկը զբաղեցնել օմբուսդմենի պաշտոնը։ Վերջիններս առանձնապես դժգոհ չեն այդ զարգացումից, սակայն նշել են, որ ևս մեկ-երկու օր պետք է սպասել հասկանալու համար արդյոք իշխանություները կարողանում են այլ որևէ թեկնածու ներկայացնելու։ 
Ցանկացած պարագայում ում էլ որ ներկայացնեն, լինի դա «Քաղաքացիական պայմանագիր» կուսակցության պատգամավո՞ր, թե՞ դրսից ներմուծված որևէ անձ, օմբուսդմենը լինելու է ոչ թե Մարդու իրավունքների, այլ Փաշինյանի իրավունքների պաշտպան, իր բոլոր գործողություններն էլ համաձայնեցնելու է գործող իշխանությունների հետ, ավելին, տարբեր մարդկանց օմբուդսմենի պաշտոն առաջարկելուց, առաջին իսկ պայմանը հենց դա է եղել, որ պետք է համաձայնվեն անցնել Փաշինյանի թրի տակով և գործող իշխանությունների քաղաքական տրամաբանությամբ գործել, և հենց այդ պատճառով է, որ շատերը հրաժարվել են իրենց առաջարկվող այդ պաշտոնից՝ հասկանալով, որ ոչ միայն վարկաբեկվելու են որպես օմբուդսմեն, այլ նաև որպես իրավաբան՝ չկարողանալով առնվազն նվազագույն չափով առաջարկ կատարել օմբուդսմենի պարտականությունները։

Արթուր Մուսայելյան