ԵՄ դիտորդական առաքելությունը հարուցել է Մոսկվայի բուռն զայրույթը

Հայաստանում երեկ իր աշխատանքներն է սկսել Եվրամիության քաղաքացիական առաքելությունը։ Շուրջ 100 դիտորդներ տեղակայվելու են հայ-ադրբեջանական սահմանին, ընդ որում նրանց կեսը լինելու է զենքով, իսկ մյուս կեսը լիովին անզեն և դիտարկելու են հայ-ադրբեջանական սահմանի ողջ երկայնքը։

Ինչպես և ի սկզբանե ակնհայտ էր, Ռուսաստանը ցավագին է ընդունում Հայաստան Եվրամիության դիտորդներ ուղարկելու հանգամանքը։ ՌԴ ԱԳՆ մամուլի քարտուղար Մարիա Զախարովան երեկ պաշտոնական հայտարարություն է տարածել՝ նշելով, որ Մոսկվան՝ Հայաստանում Եվրամիության քաղաքացիական առաքելությունը դիտարկում է որպես Ռուսաստանի տարածաշրջանից դուրս մղելու փորձ։ «Ընդգծելով նոր առաքելության բացառապես քաղաքացիական բնույթը՝ Եվրամիության ներկայացուցիչներն անազնիվ են»,- ասել է Զախարովան։

Նրա խոսքով՝ այդ առաքելությունը ծավալվում է ԵՄ ընդհանուր անվտանգության և պաշտպանության քաղաքականության իմաստով, հետևաբար պետք է համապատասխանաբար վերաբերվել դրան։ «Ցավոք սա առաջին անգամը չէ, որ արձանագրում ենք ԵՄ և ամբողջ արևմուտքի ցանկությունը, ցանկացած միջոցով ամրապնդել մեր դաշնակից Հայաստանում, այդ փորձերում մենք տեսնում ենք բացառապես աշխարահաքաղաքական ենթատեքստ»,- հայտարարել է Մարիա Զախարովան։ 

Նրա մյուս արտահայտությունը չափազանց տարօրինակ է և դուրս է Հայաստանի հետ դաշնակցային պարտավորություններից և դաշնակցության սկզբունքից և ավելի շուտ վկայում է ոչ թե հայ-ռուսական, այլ ռուս-ադրբեջանական հարաբերությունների դաշնակցային բնույթի մասին։ Զախարովան նշել է, թե ԵՄ դիտորդական առաքելության նախաձեռնության վերաբերյալ՝ Բաքվի հրապարակայնորեն արտահայտած բացասական գնահատականներն անտեսվում են, թերևս նման հայտարարություն կարող էր իրեն թույլ տալ ոչ թե Հայաստանի հետ ռազմավարական դաշնակցության մեջ գտնվող պետության, այլ Ադրբեջանի դաշնակից պետությունը՝ օրինակ Թուրքիան։

Այս դեպքում կարելի է փաստել, որ Ռուսաստանն ինքն էլ խճճվել է ստեղծված իրավիճակում և Հայաստան Եվրամիության դիտորդական առաքելություն բերելը, այն էլ Հայաստանի գործող իշխանությունների ջանքերով, լրջագույն հարված է նաև Ռուսաստանին, ինչը վստահաբար հետևանքներ է ունենալու։

Արման Արամյան