Փաշինյանական վարչախումբը կատարելագործում է նախկինների արատավոր քայլերը
ՎԵՐԼՈՒԾՈՒԹՅՈՒՆՆԵՐ
Ժողովրդավարական կարգախոսներով, թափանցիկության խոստումներով իշխանության եկած փաշինյանական վարչախումբը դեռևս մինչև հեղափոխությունը քննադատում էր Սերժ Սարգսյանի իշխանությանը ոչ թափանցիկ լինելու, մեկ անձից գնումների և այլ տարատեսակ կոռուպցիոն դրսևորումների մեջ, իսկ այժմ, ինքը տասնապատիկ ավելի կատարելագործել և չարաշահում է այդ արատավոր վարքը։
Այլևս սովորական է դարձել, որ Հայաստանի կառավարությունը ընդհուպ մինչև 60-70 հարց է քննարկում ամեն մի նիստում և բազմաթիվ դեպքերում գրեթե բոլոր հարցերը չզեկուցվող են լինում, լավագույն դեպքում հետո հայտնի է դառնում, թե ինչ որոշում է կայացվել, կամ ումից են որոշել գնումներ իրականացնել։
Քաղտեխնոլոգ Կարեն Քոչարյանի գնահատմամբ՝ չզեկուցելը, ծածկադմբոցը, մեկ աղբյուրից գնումներ կատարելը, խաբելը դարձել է այս «թափանցիկ» և «դեմոկրատիայի չեմպիոն» իշխանությունների հիմնական աշխատելաոճը։ Երեկ անգամ Երևանի ավագանու նիստում հարցերի մի մասը ներառված է եղել որպես չզեկուցվող, ինչն աննախադեպ է Երևանի ավագանու պատմության մեջ։
Ի դեպ, եթե գործադիրի դեպքում դա ինչ-որ չափով հասկանալի է, ապա ավագանու պարագայում դա առնվազն անհեթեթ է։ Հայաստանյան օրենսդրությամբ ավագանիները գործում են ոչ թե որպես գործադիր, այլ որպես օրենսդիր մարմին և պարտավոր են ապահովել առավելագույնս թափանցիկություն բոլոր հարցերում, մինչդեռ գործող քաղաքապետ Հրաչյա Սարգսյանը կամ նրա ղեկավարած քաղաքապետարանը ամեն ինչ անում են ծածկադմբոց անելու, հարցերը չզեկուցելու կամ էլ սեփական շահագրգռությամբ իրենց ցանկալի որոշումները ընդունելու։
Ավագանու ընդդիմադիր անդամների գնահատմամբ՝ զեկուցվող հարցերում առանձնակի խնդրահարույց թեմաներ չկային, բայց մտավախությունն այն է, որ ի վերջո արատավոր պրակտիկա ներդնելով՝ «Քաղաքացիական պայմանագիրը» կսկսի այն կիրառել պարբերաբար և հատկապես խնդրահարույց հարցերի պարագայում։
Լիաննա Ազատյան
