Փաշինյանի հայտարարությունները աշխարհաքաղաքական աղետ են
ՎԵՐԼՈՒԾՈՒԹՅՈՒՆՆԵՐ
Հայաստանի վարչապետի պաշտոնը զբաղեցնող Նիկոլ Փաշինյանը երեկ Ազգային ժողովում Կառավարության հետ հարց ու պատասխանի ժամանակ բավական ուշագրավ հայտարարություններ է արել։
Փաշինյանը, նախ քննադատել է ՀԱՊԿ-ին, նշել, թե ի տարբերություն ՀԱՊԿ-ի` Եվրամիությունը հստակ արձանագրել է , թե որն է Հայաստանի Հանրապետության տարածքը։ «Մենք Հավաքական անվտանգության պայմանագրի կազմակերպությունից խնդրել ենք ամենակարևոր սկզբունքային մի բան, մեզ ասել իրենց պատկերացումը, թե որն է Հայաստանի Հանրապետությունը։ Մենք այս հարցի հստակ պատասխանը չենք ստացել, մյուս կողմից Եվրամիության առաքելության գործողուղումը հնարավոր է դարձել, որովհետև Պրագայում քառակողմ հանդիպման արդյունքում, Եվրամիությունը հստակ գծագրել է, այդ թվում Հայաստանի և Ադրբեջանի մասնակցությամբ և համաձայնությամբ, թե որն է Հայաստանի Հանրապետությունը»,- նշել է Փաշինյանը։
Րոպեներ անց, նա Հայաստանում Եվրամիության դիտորդների՝ Հայաստանում տեղակայվելու հարցի վերաբերյալ մեկ այլ ուշագրավ դիտարկում էլ է արել։ Ըստ Փաշինյանի՝ մինչև ԵՄ դիտորդների Հայաստան ժամանելու որոշումը Ադրբեջանը արևմտյան հարթակներում Հայաստանի դեմ իր ագրեսիվ գործողությունները բացատրում էր այն հանգամանքով, թե Հայաստանը Ադրբեջանի հետ սահմանին ավելի ու ավելի շատ ռուսական զորքեր է տեղակայում, քանի որ պատրաստվում է Ռուսաստանի հետ համատեղ ագրեսիվ գործողություններ իրականացնել Ադրբեջանի դեմ։
Բաքուն, ըստ Փաշինյանի, արդարանում էր, թե ագրեսիվ գործողություններով փորձում է իրեն ապահովագրել։ Նիկոլ Փաշինյանը հայտարարել է, թե Արևմտյան իրենց գործընկերները սկսել են իրենց խեթ նայել, թե դուք փաստորեն իրականում պատրաստվում եք ագրեսիվ գործողություններ իրականացնել, որովհետև մեծ կուտակումներ կան ռուսական և հայկական զորքերի, որ պատրաստվում եք հարձակվել Ադրբեջանի վրա։ «Խեղճ ադրբեջանցիները ստիպված բարձունքներն են ուզում գրավել, որպեսզի հավասարակշռեն»,- նշել է Փաշինյանը և հավելել, թե Եվրամիության դիտորդներն իրականում գալիս են ոչ միայն Հայաստանի և Ադրբեջանի սահմանը դիտարկելու, այլ նաև վերահսկելու ռուսական զորքերի տեղաշարժերը։
ՀՀԿ փոխնախագահ Արմեն Աշոտյանի գնահատմամբ՝ Նիկոլ Փաշինյանի այս հայտարարությունը աշխարհաքաղաքական կատարյալ աղետ է։ «Փաստորեն ԵՄ դիտորդները գալիս են ոչ թե մեր անվտանգությունը ապահովելու, այլ ռուսական զորքի շարժը դիտարկելու համար»,- ընդգծում է Արմեն Աշոտյանը։
Տարօրինակ մի հայտարարություն էլ նախօրեին Երևանում արել է Խորվաթիայի արտգործնախարարը, նշելով թե ՝«ԵՄ առաքելությունը ստատուս քվոն որևէ կերպ չի երաշխավորելու», ինչը վկայում է, որ եվրոպացի դիտորդներն իրականում բոլորովին այլ նպատակով են գալիս Հայաստան, ինչն էլ ուղղակի կերպով խորհրդարանում խոստովանել է Նիկոլ Փաշինյանը»։
Աննա Նադոյան
