Թուրքիային ամեն ինչ, Սիրիային՝ միայն սնունդ. Փաշինյանի օգնությունը
ՎԵՐԼՈՒԾՈՒԹՅՈՒՆՆԵՐ
Հայաստանը օգնություն է ցուցաբերում երկրաշարժից տուժած երկու երկրներին՝ Թուրքիային և Սիրիային։
Նիկոլ Փաշինյանը երեկ հեռախոսազրույցներ է ունեցել Ռեջեփ Թայիփ Էրդողանի և Բաշար Ալ Ասադի հետ, զորակցություն և ցավակցություն է հայտնել բազմաթիվ զոհերի կապակցությումբ։ Թուրքիայի նախագահի հետ զրույցում Փաշինյանն ասել է, թե «Զվարթնոց» օդանավակայանից թռիչքի է պատրաստվում Հայաստանի Հանրապետության փրկարարական ուժերին աղետի գոտի տեղափոխող ինքնաթիռը, Ասադի հետ զրույցում նշել է, թե Հայաստանը պատրաստվում է աջակցել Սիրիային՝ առաջին հերթին սնունդ, ինչպես նաև այլ տեսակի օգնություն ուղարկելով։
Ավելի ուշ արդեն հայտնի դարձավ, որ հայ փրկարարների խումբը և տեխնիկան ժամանել են Թուրքիա՝ մասնակցելու փլատակների հեռացման աշխատանքներին և փրկարարական գործողություններին։
Անշուշտ, Փաշինյանի այս որոշումը լուրջ ցնցումներ է առաջացրել հայ հանրության մեջ, շատերը մեղադրում են թշնամական երկրին օգնություն ցուցաբերելու մեջ։ Բացառապես պրագմատիկ քաղաքականության առումով եթե նայենք, Թուրքիա և Սիրիա օգնություն ուղարկելու որոշումը, իհարկե, արդարացված է և անհրաժեշտ, հատկապես, որ Էրդողանն ինքն է շնորհակալություն հայտնել զորակցության համար և նշել, որ Թուրքիայի կառավարությունը բարձր է գնահատում Հայաստանի աջակցությունը՝ կարևորելով այդ քայլը նաև երկու երկրների միջև հետագա երկխոսության խորացման տեսանկյունից։
Տարօրինակն այս ամենում օգնության ծավալներն են երկու երկրներին, եթե Սիրիային միայն սնունդ, ինչպես նաև այլ տեսակի օգնություն է ուղարկվում, ապա Թուրքիային ուղարկված օգնությունն ամբողջ ծավալով է՝ փրկարարներ, տեխնիկա, անհրաժեշտ սարքավորումներ։
Ավանդաբար Հայաստանի հետ բարեկամական հարաբերություններ ունեցող Սիրիային ավելի պակաս օգնություն ուղարկելու հանգամանքը լուրջ տարակուսանք է առաջացնում, առավել ևս, որ ավերիչ երկրաշարժից հետո տասնյակ պետություններ են օգնություն ուղարկել Թուրքիա, մինչդեռ Սիրիան շատ ավելի ծանր իրավիճակում է գտնվում, իսկ այնտեղ բավարար չափով օգնություն չի հասնում, ուստի և Փաշինյանը կարող էր առնվազն հավասարաչափ օգնություն ուղարկել երկու երկրներին։
Ինչևէ, բարեկամ և թշնամի երկրների միջև հակառակ տարբերություն դնելու Նիկոլ Փաշինյանի այս քայլը լուրջ խմորումների և խնդիրների կարող է հանգեցնել։
Լուիզա Պողոսյան
