Իշխող ուժի այս վարքը վկայում է, որ նրանք ձեռք են քաշել Արցախից

Ոչ ոք ավելի շատ ջանք չի գործադրում փաշինյանական վարչախմբի վարկանիշը բարձրացնելու, Հայաստանում քաղաքական խոսքն արժեզրկելու ուղղությամբ, որքան հայաստանյան ընդդիմությունը։

Խորհրդարանում երեկ լսումներ էին հրավիրել նվիրված Լաչինի միջանցքի փակելու թեմային։ Ելույթ ունեցողները հիմնականում ընդդիմության ներկայացուցիչներ էին, որոնք Լաչինի միջանցքի փակման վերաբերյալ իրենց տեսակետները հայտնելուց զատ նաև մի ամբողջական վիճահարույց հայտարարություններ են արել, ինչն, իհարկե, փաշինյանական վարչախումբն անպայման օգտագործելու է սեփական քարոզչական նպատակներով։

Բնականաբար ընդդիմությունը որևէ քննադատական խոսք չի հնչեցրել ՌԴ արտգործնախարար Սերգեյ Լավրովի հայտարաությունների վերաբերյալ: Միքայել արքեպիսկոպոս Աջապահյանը, օրինակ, հայտարարել է, թե երբ գնում է Արցախ իրեն ռուսն ու ադրբեջանցին չեն կանգնեցնում, հայ զինվորն է կանգնեցնում և ասում է չես կարող գնալ Արցախ: «Ուրեմն ո՞վ է փակել ճանապարհը»,- հարցադրում է անում արքեպիսկոպոսը։

Նախկին վարչապետ Հրանտ Բագրատյանն էլ հայտարարել է, թե պետք է շնորհակալություն ասել, որ Լավրովն ասել է 7 շրջան, այլ ոչ 12։ Ընդդդիմադիր գործիչ Ռուբեն Հակոբյանն էլ առաջարկել է մահապարտների թիմ ձևավորել, որը կհեռացնի այս իշխանությանը։

Իհարկե, հատուկենտ խնդրահարույց ելույթներից բացի հնչել են նաև բավական լուրջ փաստարկված գնահատականներ, մասնավորապես ընդդիմադիր գործիչները նշել են, որ Լաչինի միջանցքի փակումը այնքան քաղաքական կամ հումանիտար խնդիր չէ, որքան որ դրանով Ադրբեջանը սեփական ռազմական խնդիրներն է լուծում, իսկ Հայաստանի գործող իշխանությունները անբավարար չափով են արձագանքում Ադրբեջանի վարքին։

Ընդդիմադիր պատգամավոր Անդրանիկ Թևանյանի գնահատմամբ էլ իշխանությունները շրջանառության մեջ են դրել հետևյալ թեզը՝ «Պետք է հանձնել Ղարաբաղը, որպեսզի Հայաստանը փրկենք»։

Ի դեպ, րոպեներ անց հենց այդ թեզը հաստատել է իշխող ուժի ներկայացուցիչը։ «Քաղպայմանագրից» դահլիճում ներկա է եղել միայն պատգամավոր Գուրգեն Արսենյանը, որը բարձրացել է ամբիոն և հոխորտացել ընդդիմադիրների հասցեին՝ «Ինչի՞ մասին եք խոսում, էս ի՞նչ սպառնալիքներ եք ուղղում Հայաստանի գործող իշխանությանը, օրինական իշխանությանը, դուք տե՞ր եք ձեր սպառնալիքներին, ձեր դատավճիռը տվել ա ժողովուրդը, տվել ա ընտրությունների ընթացքում»,- հայտարարել է Արսենյանը և բառացի ասել. «Անընդհատ 120 հազար Ղարաբաղի բնակիչներ եք ասում, 3 միլիոն Հայաստանի բնակիչնե՛ր, պատասխանատու ենք մենք էդ մարդկանց համար, պատասխանատու ենք մեր երկրի համար»։ Իրավիճակը դահլիճում կտրուկ թեժացել է, որից հետո Արսենյանը լքել է տարածքը և հեռացել։

Ընդհանրապես, իշխող ուժի այս վարքը վկայում է, որ նրանք ձեռք են քաշել Արցախից, իսկ ընդդիմությունը դեռևս բավարար քաղաքական կամք և քաղաքական միտք չի կարողանում գտնել գործող իշխանություններին հեռացնելու համար։