Արևմուտքի ակտիվացումը հարուցել է Մոսկվայի բուռն դժգոհությունը

Հայ-ադրբեջանական կարգավորման գործընթացում, ինչպես և սպասելի էր, հավաքական Արևմուտքի ակտիվացումը հարուցել է Մոսկվայի բուռն դժգոհությունը, և Ռուսաստանը, որն Ուկրաինայում պատերազմի կապակցությամբ գրեթե սառեցրել էր իր ներգրավվածությունը կարգավորման գործընթացին, ընդհուպ բանը հասել էր ադրբեջանցիների կողմից Լաչինի միջանցքը փակելուն, այժմ արդեն մի քանի հայտարարությունով հստակ ցույց է տալիս, որ նախատեսվում է վերադառնալ ակտիվ բանակցային գործընթաց։

Ռուսաստանի ԱԳՆ-ն հրապարակել է Սերգեյ Լավրովի տարեվերջյան ասուլիսին ուղղված հարցերի գրավոր պատասխանները, որտեղ նշվում է, թե Մոսկվան ակտիվորեն աշխատում է Հարավային Կովկասում կուտակված կոնֆլիկտային ներուժը հաղթահարելու ուղղությամբ, ընդ որում, եթե արևմտյան բազմաթիվ երկրներ հստակ արձանագրում են, որ Լաչինի միջանցքը փակել է Ադրբեջանը, ապա Ռուսաստանը գրեթե հավասարության նշան է դնում երկու երկրների միջև, ինչը վկայում է հայկական կողմի նկատմամաբ Ռուսաստանի ունեցած լուրջ դժգոհության մասին։

Մեկ այլ նախաձեռնություն, որը առաջ է մղելու Ռուսաստանը, հայտնի 3+3–ն է։ 44-օրյա պատերազմից հետո այդ նախաձեռնությամբ մի քանի հանդիպումներ տեղի ունեցան։ Վրաստանն առայժմ հրաժարվում է ակտիվորեն մասնակցել այդ նախաձեռնությանը, սակայն աշխարհաքաղաքական իրավիճակից դրդված նաև ստիպված կլինի որոշակիորեն ներգրավվել։

3+3-ը նաև լուրջ հնարավորություն կտա տարածաշրջանում խաղաղություն բերելու համար՝ հաշվի առնելով, որ այդ նախաձեռնությանը մասնակցում են ոչ միայն Հարավ-կովկասյան երեք երկրները, այլ նաև Իրանը, Թուրքիան և Ռուսաստանը։ Ուստի և Ռուսաստանը փորձելու է առաջ մղել նաև այդ նախաձեռնությունը, ինչպես նաև հայ-թուրքական հարաբերությունների կարգավորման ն ուղղված քայլերը։

Ռուսաստանի ԱԳՆ-ն հիշեցրել է, որ հատուկ բանագնացներ Ռուբեն Ռուբինյանի և Սերդար Քըլըչի առաջին հանդիպումը կայացել է Մոսկվայում։ «Մենք երկուսի հետ էլ սերտ կապ ենք պահպանում, ողջունում ենք վերջին տեղաշարժերը, որոնք հայ-թուրքական հարաբերությունների վերականգնման հեռանկարներ են ստեղծում, ինչն իր հերթին կնպաստի տարածաշրջանային իրավիճակի առողջացմանը»,- հայտարարել է Ռուսաստանի ԱԳՆ-ն, ըստ էության Ռուսաստանի ակտիվացումը լուրջ վտանգներ է սպառնում ոչ միայն Արևմուտքի ՝ Հայաստան մուտք գործելու հանգամանքին, այլև գործող փաշինյանական վցարչախմբին։

Մոսկվայում այլևս ձեռք են քաշել Նիկոլ Փաշինյանից։

Մինաս Ավագյան