Նոր շոու՝ հրդեհից ուշադրություն շեղելու համար. Սեյրան Օհանյանին կզրկեն անձեռնմխելիությունից

Գլխավոր դատախազ Աննա Վարդապետյանը դիմել է Ազգային ժողովի նախագահ Ալեն Սիմոնյանին «Հայաստան» խմբակցության ղեկավար, Պաշտպանության նախկին նախարար Սեյրան Օհանյանին պատգամավորական անձեռնմխելիությունից զրկելու և որպես մեղադրյալ քրեական գործերով ներգրավելու համար։

Ներկայացված երեք միջնորդագրերով՝ Պաշտպանության նախկին նախարարը մեղադրվում է առանձնապես խոշոր չափերով վատնումներ, պաշտոնական դիրքը ծառայության շահերին հակառակ օգտագործելու, առանձնապես խոշոր չափերի գույք հափշտակելու մեջ։

Արդեն հաջորդ քառօրյային՝ փետրվարի 7-ին, Օհանյանի՝ անձեռնմխելիությունից զրկելու հարցը կներառվի օրակարգում։ Ամենևին ցանկություն չունենք Սեյրան Օհանյանին ներկայացնելու, որպես անմեղ արարած, եթե նա իսկապես կատարել է այդ հանցագործությունները, ապա անպայման հարկավոր է պատժել, մինչդեռ, հիշեցնենք, որ գործող փաշինյանական վարչախումբը 5 տարի իշխանության ղեկին է և առայսօր որևէ թալանչի, որևէ նախկին հանցագործի այդպես էլ չի կարողացել պատժել, իսկ իրականում, ճիշտ է նշում Սեյրան Օհանյանը, որ հարուցված քրգործում ներկայացված միջնորդագրերը ընդամենը շոու են, այն էլ իրականացվել են հատուկ այս օրերին՝ նախօրեին տեղի ունեցած սարսափելի հրդեհի հետևանքներից հանրության ուշադրությունը շեղելու և «նախկիններ-ներկաներ» դիսկուրսով մանիպուլացնելու նպատակով։

Նույն Սեյրան Օհանյանի պաշտոնավարման օրոք հայ զինվորները նման անմխիթար պայմաններում չէին գտնվում, իսկ բանակն էլ այսպիսի խայտառակ վիճակում չէր, ինչ փաշինյանական իշխանության և նրա Պաշտպանության նախարար Սուրեն Պապիկյանի օրոք։

Ավելին, Սեյրան Օհանյանը շրջում էր երկու ավտոմեքենայով, ի տարբերություն Պապիկյանի, որը 5-6 մեքենաներով է շրջում և վաղուց վերածվել է իշխանական թիվ մեկ օլիգարխի։ Ուստի և, եթե որևէ մեկին պետք է քրեական պատասխանատվության ենթարկել, դա առաջին հերթին գործող իշխանության Պաշտպանության նախարարն է և Նիկոլ Փաշինյանը։

Մինաս Ազատյան