Փորձագետը անհիմն է համարել Փաշինյանի քննադատությունը ռուս խաղաղապահների հասցեին
ՔԱՂԱՔԱԿԱՆՈՒԹՅՈՒՆ
Pravda.ru–ն գրում է, որ Արաբական և իսլամական հետազոտությունների կենտրոնի առաջատար գիտաշխատող Բորիս Դոլգովը Pravda.Ru-ին տված հարցազրույցում մեկնաբանել է Հայաստանի վարչապետ Նիկոլ Փաշինյանի քննադատությունը ռուս խաղաղապահների հասցեին, որոնք վերահսկում են Լեռնային Ղարաբաղը և Հայաստանը կապող Լաչինի միջանցքը։ Փորձագետը անհիմն է համարել Փաշինյանի քննադատությունը ռուս խաղաղապահների հասցեին: «Հայաստանի և Ռուսաստանի հարաբերությունները մակարդակով որոշակիորեն իջել են: Ամերիկան փորձում է միջամտել հայ-ադրբեջանական հակամարտության կարգավորմանը: Թուրքիան վաղուց է հանդես գալիս Ադրբեջանի կողմից: Հայաստանի ղեկավարության տեսանկյունից Ռուսաստանը բավականաչափ ակտիվ չէ Հայաստանի շահերը առաջ տանելու համար, բայց ակնհայտ է, որ ռուս խաղաղապահները գործում են համաձայն այն պայմանների, ինչը ձեռք է բերվել հակամարտությունը դադարեցնելու պայմանավորվածության արդյունքում, նրանք խաղաղապահներ են, բայց ոչ մի դեպքում ռազմական ուժ, որը պետք է գործի Հայաստանի կողմից»,- ասել է Դոլգովը։
Փորձագետը կարծում է, որ հաշվի առնելով Փաշինյանի հակառուսական հայտարարությունները ԱՄՆ-ն ակտիվորեն կփորձի Հայաստանին ներքաշել դեպի արևմտյան երկրների դաշինք։ «Հիմա Երևանը կենտրոնացած է ԱՄՆ-ի և Ֆրանսիայի վրա: Հայաստանը կարծում է, որ այդ երկրները Հայաստանի կողմից ավելի ակտիվ են գործել, քան Ռուսաստանը: Արևմուտքը հետապնդում է իր շահերը բոլոր տարածաշրջաններում, այդ թվում Հարավային Կովկասում, և ԱՄՆ-ն ավելի ակտիվ կփորձի Հայաստանին ներգրավել դեպի արևմտյան դաշինք»,-ասել է նա։
Նյութը հրապարակման պատրաստեց Կամո Խաչիկյանը
