Պետք է պատրաստ լինենք ապահովելու մեր երկրների անվտանգությունը ապագայում, որն այնքան էլ խաղաղ չի լինելու․ Վուչիչ
ՄԻՋԱԶԳԱՅԻՆ
Սերբիան և Ադրբեջանը մեծ ներուժ ունեն պաշտպանական արդյունաբերության ոլորտում տեխնոլոգիաների փոխանակման և երրորդ երկրների շուկաների համար որոշակի տեսակների արտադրանքի համատեղ արտադրության համար։
Այս մասին Սերբիայի նախագահ Ալեքսանդր Վուչիչն ասել է Ադրբեջանի նախագահ Իլհամ Ալիևի հետ հանդիպումից հետո մամուլի ժամանակ, հայտնում է ԱՊԱ-ն։
Նշելով, որ ինքը շատ արդյունավետ քննարկումներ է ունեցել Ադրբեջանի պաշտպանական արդյունաբերության նախարարի հետ, Սերբիայի նախագահն ասել է․ «Կարծում եմ, որ պաշտպանության ոլորտի ներկայացուցիչները և ես Ադրբեջանում շատ բան ենք սովորել զինված ուժերի գործունեության, ինչպես նաև նրանց կառուցվածքի վերաբերյալ։ Մենք պատրաստ ենք շատ հարցերի շուրջ տեղեկություններով փոխանակվել։ Մենք արտադրում ենք որակյալ զինամթերք և զենք: Մենք պատրաստ ենք միասին դիտարկել ամեն ինչ արդիականացնելու և աշխարհից հետ չմնալու ուղիները՝ ինքներս մեզ ապահովելու համար։ Որովհետև այս դժվարին ժամանակահատվածում տեսել ենք, թե ինչպես կարող են մեծ երկրները կարճ ժամանակահատվածում կորցնել այդքան ուժ, իսկ պատժամիջոցները կարող են կործանարար ազդեցություն ունենալ։ Պետք է պատրաստ լինենք պաշտպանել և ապահովել մեր երկրների անվտանգությունն ապագայում, որն այնքան էլ խաղաղ չի լինելու»։
