Փաշինյանական իշխանությունը գրոհում է Կենտրոնական բանկը
ՎԵՐԼՈՒԾՈՒԹՅՈՒՆՆԵՐ
Ազգային Ժողովի ֆինանսավարկային և բյուջետային հարցերի մշտական հանձնաժողովը Կենտրոնական բանկի նախագահի տեղակալի պաշտոնում հավանություն է տվել Արմեն Նուրբեկյանի թեկնածությանը։ Թեկնածուն առաջադրել էր իշխող «Քաղաքացիական պայմանագիր» խմբակցությունը, և առաջիկայում խորհրդարանը բնականաբար կհաստատի այս թեկնածությունը։
Բանն այն է, որ Կենտրոնական բանկը առնվազն 2018 թվականի իշխանափոխությունից հետո աստիճանաբար վերածվել է փաշինյանական ամրոցի, ընդ որում այս ամենը իրականացվել է առանց մեծ աղմուկի, և հանրությունը լուրջ ուշադրություն չի դարձրել նման նշանակումներին։
Մինչդեռ, ի տարբերություն քաղաքական և իրավական պաշտոնների առաջադրումների, Կենտրոնական բանկում «Քաղպայմանագրի» առաջադրումները շատ ավելի նշանակային են և ավելի մեծ չափով են ազդում հանրության բնականոն կենսագործունեության վրա։
ՀՀ ԿԲ-ն տարիներ շարունակ ավելի անկախ է եղել, հատկապես նախկինների օրոք, կարողացել է լուրջ պրոֆեսիոնալների հավաքել և իրականացնել դրամավարկային քաղաքականությունը՝ երբեմն հարկ եղած դեպքում չենթարկվելով կենտրոնական իշխանության հրահանգներին։ Ժողովրդավարության մասին ճառող Փաշինյանը, ընդհակառակը, փորձում է գլխավոր դրամատունը վերածել իր կցորդի, որպեսզի կարողանա վերահսկել նաև ֆինանսական բոլոր շարժերը՝ այդ թվում Հայաստանում գործող բանկերում։
Ուստի 2018 թվականից հետո Կենտրոնական բանկի կազմը գրեթե ամբողջությամբ փոխվել է, միակ մարդը, որ առայժմ մնացել է նախկիններից ֆինանսների նախկին նախարար Ներսես Երիցյանն է, որի ոչ բվվոցն է դուրս գալիս, ոչ՝ գվվոցը։ Փոխարենը ԿԲ խորհրդի անդամ են դարձել Ալեն Սիմոնյանի նախկին օգնականը, մի նախարարի մտերիմ, տարատեսակ այլ անձինք, որոնք ոչ մի քաղաքական կողմնորոշում չունեն, ոչ էլ պրոֆեսիոնալ հատկություններ, փոխարենը սերտ հարաբերությունների մեջ են փաշինյանական իշխանության հետ։
Եվ այժմ էլ Մարտին Գալստյանի տեղակալի պաշտոնում Նուրբեկյանի թեկնածությունը վկայում է, որ «Քաղաքացիական պայմանագիրը» ամբողջությամբ զավթել է Կենտրոնական բանկը։
Ի դեպ, Մարտին Գալստյանի մասին, թեև նա համարվում էր Նիկոլ Փաշինյանի մարդը և Ազգային ժողովի նախկին նախագահ Բաբկեն Արարքցյանի փեսան է, լուրջ խնդիրներ ունի սեփական տեղակալների հետ, ուստի փաշինյանական իշխանությունը փորձում է սահմանափակել նրա լիազորությունների շրջանակը և խուսանավելու հնարավորությունները, ինչպես նաև զրկել միջազգային ֆինանսական կառույցների հետ անկախ հարաբերվելու հնարավորություններից, ինչը մեկ անգամ ևս վկայում է, որ Նիկոլ Փաշինյանը առանձնապես վստահություն չունի նույնիսկ սեփական կադրերի նկատմամբ։
Էլինա Մամյան
