Հեռացող պաշտոնյաները դիֆերամբներ են ձոնում Փաշինյանին․ ի՞նչ ակնկալիքներ ունեն

Նախագահ Վահագն Խաչատուրյանը երեկ ԿԳՄՍ նախարարի պաշտոնում նշանակել է Ժաննա Անդրեասյանին, ինչպես և ակնկալվում էր։ Հիշեցնենք նախկին նախարար Վահրամ Դումանյանը և փոխվարչապետ Համբարձում Մաթևոսյանը նախօրեին լքել էին իրենց պաշտոնները։

Եվ եթե ԿԳՄՍ նախարարի դեպքում որևէ տարակարծություն չկար, որ հենց Անդրեասյանն է նշանակվելու, փոխվարչապետի պաշտոնում առայժմ նշանակում չի արվել, նույնիսկ չեն ակնարկել, թե ում են ցանկանում նշանակել։ Ինչպես ավելի վաղ ենք հայտնել, իշխանությունը մտադիր է ոչ թե իր կազմից, այլ ավելի շատ տեխնոկրատի նշանակել փոխվարչապետի պաշտոնում, տնտեսական ծանրագույն իրավիճակում որոշակի լուծումներ փնտրելու ուղղությամբ։

Տարօրինակն այն է, որ պաշտոնազրկված երկու անձինք էլ դուրս գալուց հետո ֆեյսբուքում սիրատոչոր գրառումներ են արել ի Նիկոլ Փաշինյան, հայտնել իրենց հավատարմությունը, նշել, որ պատրաստ են շարունակել իրենց ծառայությունը Հայաստանի Հանրապետությանը։ Սովորաբար Հայաստանում Փաշինյանի օրոք պաշտոնազրկված անձինք կամ շատ արագ վերածվում են ընդդիմադիրների, կամ էլ երկար ժամանակ լռում են նոր պաշտոն ստանալու ակնկալիքով։ Երկրորդ դեպքը տեղի ունեցավ Արագածոտնի մարզպետ Դավիթ Գրիգորյանի հետ։

Պաշտոնանկությունից հետո նա ամիսներ շարունակ գործազուրկ էր, սակայն տառ անգամ չի գրել և չի քննադատել Նիկոլ Փաշինյանին, նրան ի վերջո խրախուսեցին և նշանակեցին վարչապետի օգնական։

Ըստ երևույթին, Դումանյանի և Մաթևոսյանի բուռն ակտիվությունը և դիֆերամբներն առ «սիրելի առաջնորդ» վկայում է, որ նրանց ինչ որ բան է խոստացվել, կամ էլ առնվազն որոշակի կոմպրոմանտներ ունի իշխանությունը, որպեսզի թույլ չտա այդ երկու պաշտոնյաները լեզուները շաղ տան այսուայն կողմ։

Իսկ առաջիկայում կադրային փոփոխությունները շարունակական են լինելու։ Մեր տեղեկություններով, դեռ երեկ պետք է ևս երկու նախարարի պաշտոնանկ անեին, սակայն Լաչինի միջանցքում ստեղծված իրավիճակը և իշխանությունների լռությունը պատճառ են դարձել, որ առայժմ մի քանի օր ձեռնպահ մնան պաշտոնանկություններից։ Լաչինում իրավիճակը հանդարտեցնելուց անմիջապես հետո կհայտարարվի նոր վերադասավորումների մասին։

Սերինա Ստեփանյան