Ժողովրդագրական իրավիճակը ծայրահեղ մտահոգիչ է

Հայաստանի ժողովրդագրական իրավիճակի մասին վիճակագրական կոմիտեի ցուցանիշները ծայրահեղ մտահոգիչ են։ Նույնիսկ նախորդ տարվա հունվար-հոկտեմբեր ամիսների համեմատությամբ, այս տարվա ցուցանիշները նվազել են՝ բացառությամբ ամուսնալուծությունների։

Ըստ այդմ՝ նշվում է, որ նշված ժամանակահատվածում ծնվել է 29906 մարդ, 2021 թվականին՝ 30285։ Զգալիորեն նվազել է նույնիսկ մահերի ցուցանիշը՝ 4557-ով։ 2022 թվականին մահացել է 22579 մարդ, իսկ նախորդ տարում մահացածների թիվը կազմում է 27136։ Հայաստանում նաև սկսել են չափազանց քիչ ամուսնանալ։ 2021 թվականին 14473 զույգ պսակադրվել է, իսկ այս տարի ընդամենը՝ 14036։ Եթե նախորդ տարի ամուսնալուծվելու որոշում կայացրել է 3692 զույգ, ապա այս տարի՝ 3764 զույգ։

Ժողովրդագրական նվազող ցուցանիշները վկայում են, որ 2050 թվականին 5 միլիոն դառնալու Նիկոլ Փաշինյանի խոստումը, բացարձակ անիրագործելի է, ավելին կարելի է ծաղր համարել սեփական պետության նկատմամբ։

ՄԱԿ-ի կանխատեսումների համաձայն՝ Հայաստանում ծնելիությունը 2050 թվականին կարող է նվազել մինչև 24000, իսկ բնակչությունը 30 տարուց կկազմի ընդամենը 2.6 միլիոն մարդ պաշտոնական տվյալներով։

Փորձագետները նշում են, թե Հայաստանի համար ժողովրդագրական երկու հիմնական մարտահրավերներ են ցածր ծնելիությունն ու արտագաղթը։ Երկու դեպքում էլ պետության իրականացրած գործառույթները չափազանց քիչ են և բացարձակապես չեն համապատասխանում ստեղծված իրավիճակին։ 44-օրյա պատերազմից հետո արտագաղթի տեմպերն ավելի են ուժգնացել, իսկ հանրությունը չունի բավարար մոտիվացիա ծնելիության մակարդակը բարձրացնելու համար։

Տաթև Հախնազարյան