Քաղաքագետ. Զատուլինին Հայաստան չթողնելու որոշումը կայացրել է Փաշինյանը
ՎԵՐԼՈՒԾՈՒԹՅՈՒՆՆԵՐ
Regnum.ru-ն գրում է, որ Կոնստանտին Զատուլինի մուտքը Հայաստան արգելելու իր որոշմամբ Նիկոլ Փաշինյանը հերթական անգամ արտահայտեց իր ապազգային էությունը։
Այդ մասին REGNUM-ի թղթակցին ասել է «Ազատագրում» շարժման առաջնորդ, @mikayelbad հեռագրային ալիքի հեղինակ Միքայել Բադալյանը։
«Զատուլինի մասին որոշումը կայացվել է ամենավերևում, այսինքն ուղիղ Փաշինյանի կողմից։ Տեղեկություններ կան, որ ռուս գործիչների ցանկը, որոնց պատրաստվում են արգելել մուտք գործել Հայաստան, բավականին մեծ է։ ՌԴ ԱԳՆ-ն արդեն արձագանքել է, պաշտոնական հայտարարություն արել ու ասել, որ նման քայլը բարեկամ, դաշնակից երկրի պահվածք չէ։ Եվ այդ գնահատականը միանգամայն ճիշտ է։
Ավելին, նման քայլը հակահայկական է, և ևս մեկ անգամ Հայաստանի իշխանությունները, և անձամբ Նիկոլ Փաշինյանը ապացուցում են, որ ոչ մի կերպ չեն պաշտպանում Հայաստանի ազգային շահերը, քանի որ Զատուլինը դեռ 1995 թվականին նախաձեռնել էր Ռուսաստանում Հայոց ցեղասպանության ճանաչման նախաձեռնությունը, և նա մի մարդ է, ով մի քանի տասնամյակ աշխատել է հայ-ռուսական բարեկամության ամրապնդման ուղղությամբ։
Մարգարիտա Սիմոնյանն աշխարհի ամենաազդեցիկ կանանցից է, և չնայած Փաշինյանի հետ նրա հարաբերությունները թշնամական են, բայց մուտքի արգելքը թուլություն է, սա լրիվ ոչ պետականամետ մարդու դիրքորոշում է և ևս մեկ ապացույց, որ Փաշինյանի համար անձնական շահերն ավելի առաջնային են, քան պետականը»,- ասել է փորձագետը։
Հիշեցնենք, որ Հայաստանի իշխանություններն արգելել են ՌԴ Պետդումայի պատգամավոր Կոնստանտին Զատուլինին և RT հեռուստաալիքի գլխավոր խմբագիր Մարգարիտա Սիմոնյանին մուտք գործել Հայաստան։
Նյութը հրապարակման պատրաստեց Կամո Խաչիկյանը
