Արցախում մտադիր են կոշտ պատասխանել Փաշինյանին․ Հանրահավաք է լինելու
ՎԵՐԼՈՒԾՈՒԹՅՈՒՆՆԵՐ
Արցախի Ազգային ժողովը հոկտեմբերի 30-ին նիստ է գումարելու, որտեղ հայտարարություն է ընդունելու, իսկ նիստը հետո շարունակվելու է արդեն «Վերածննդի» հրապարակում՝ հանրահավաքի տեսքով։
Մեր տեղեկությունների համաձայն՝ Արցախի Ազգային ժողովը մտադիր է բավական կոշտ հայտարարություն ընդունել, որը մի քանի բաղկացուցիչներ ունի։ Ըստ այդմ, նշվում է, որ Արցախի Ազգային ժողովը ցանկանում է այդ հայտարարությունում ամրագրել, որ Արցախի և նրա ժողովրդի համար անընդունելի է որևէ տարբերակ, որով Արցախը բռնակցվելու է Ադրբեջանին։
Երկրորդ՝ կոշտ քննադատություն է հնչելու Հայաստանի իշխանությունների հասցեին և պահանջ է ներկայացվելու ցանկացած հարթակում վերադառնալու Արցախի անվտանգության երաշխավորի դիրքերին, այլ ոչ թե խոսելու հանձնողի դիրքերից։ Հայտարարության երրորդ բաղկացուցիչն ուղղված է Ռուսաստանին, պարզ դիմելու են ՌԴ ղեկավարությանը՝ Արցախի ժողովրդի անվտանգությունը հետայսու ևս ապահովելու, նշելու են, որ ՌԴ իշխանությունները պետք է ոչ միայն լինեն Արցախի անվտանգության երաշխավորը, այլև խաղաղապահ զորակազմը պետք շարունակի մնալ Արցախում, նաև հնգամյա մանդատի երկարաձգելուց հետո։
Արցախի քաղաքական ուժերը մեկ հարցում բավականին լուրջ կոնսեսուս ունեն, նշելու են, թե իրենց համար ընդունելի չէ այսպես կոչված վաշինգտոնյան փաստաթուղթը, որը որևէ աղերս չունի Արցախի հարցերի հիմքերի հետ և գոյաբանական խնդիրներ կարող է ստեղծել Արցախի բնակչության համար։ Ըստ այդմ, Արցախի իշխանություններն ավելի հակված են ընդունելու ռուսական տարբերակը, որով Արցախի կարգավիճակի հարցը առկախվելու է՝ հնարավորություն տալով Արցախի ազգաբնակչությանը շունչ քաշելու։
Հանրահավաքին ելույթ է ունենալու նաև Արցախի նախագահ Արայիկ Հարությունյանը, վերջինս թեև տևական ժամանակ փորձում է « ոչ շիշը վառել, ոչ ՝ քյաբաբը», այսինքն հնարավորինս մեղմ արտահայտվել Հայաստանի իշխանությունների համար, սկայն այս անգամ ստիպված է լինելու մի կողմ դնել դիվանագիտական ձևակերպումներն ու մեղմացվածությունները և գրեթե բաց տոնով պահանջներ է ներկայացնելու Նիկոլ Փաշինյանի վարչախմբին։
Մեր աղբյուրի փոխանցմամբ՝ նման պահանջ հնչել է Արցախի բոլոր քաղաքական ուժերից և Արայիկ Հարությունյանը խուսանավելու որևէ հնարավորություն չունի։
Տիգրան Ալավերդյան
