«Խաղաղության պայմանագրի վտանգները» և թուրքական հոխորտանքը
ՎԵՐԼՈՒԾՈՒԹՅՈՒՆՆԵՐ
Թուրքիայի և Ադրբեջանի նախագահներ Ռեջեփ Թայիփ Էրդողանն ու Իլհամ Ալիևը, նախօրեին, Արցախից զավթած Կովսականում, որն ադրբեջանցիները Զանգելան են անվանում, միջազգային օդանավակայան են բացել։
44-օրյա պատերազմից հետո ընդամենը մեկուկես տարում Ադրբեջանը լուրջ ենթակառուցվածքներ է ստեղծել, և Էրդողանը մեծի իրավունքով ժամանել էր անձամբ «տեսչական ստուգում» իրականացնելու, պարզելու, թե ինչպես են ծախսվել թուրք-ադրբեջանական տանդեմի գումարները։
Օդանավակայանի բացումը նաև լավ առիթ էր դարձել Էրդողանի համար հերթական հոխորտանքները տալու Հայաստանի հասցեին։ Մասնավորապես նա հայտարարել է, թե անհրաժեշտ է համարում՝ Հաագայի միջազգային դատարանի միջոցով Հայաստանից պահանջել փոխհատուցում վճարել Ադրբեջանին՝ Ղարաբաղին հասցված վնասի և ավերածությունների համար։
«Անհրաժեշտ է նրանց (հայերին-խմբ․) անկյուն քշել»,- ասել է Էրդողանը։ Ըստ էության Թուրքիայի նախագահի այս հայտարարությունը բացահայտում է Հայաստանի նկատմամբ թշնամիների իրական նպատակները,իսկ «Խաղաղության դարաշրջան» բացելու փաշինյանական փորձը ոչ այլ ինչ է, ինչ Հայաստանին հերթական հարված հասցնելու քայլ։
Եթե Հայաստանը խաղաղության պայմանագիր ստորագրի, ապա, ինչպես նշում են բազմաթիվ վերլուծաբաններ, խոստովանելու է, որ ինքն է ագրեսորը, իսկ նման հարկադիր խոստովանանքը հրաշալի առիթ է դառնալու թշնամիների համար՝ Հյաստանին ոչ միայն բարոյապես, այլ նաև տնտեսապես նեղելու, զրկելու ինքնաբավությունից և տնտեսական ու քաղաքական ազատություններից և վերածելու թուրք-ադրբեջանական տանդեմի կցորդի։
Թե՛ Ալիևը և թե՛ Էրդողանը իրենք էլ չեն թաքցնում իրենց այս նպատակը, միայն Նիկոլ Փաշինյանի ապիկար ու դավաճան իշխանությունն է, որ շարունակում է առաջ մղել խաղաղության դարաշրջան բացելու այս դավադիր օրակարգը՝ հստակ գիտակցելով Հայաստանի Հանրապետությանը և Արցախին սպառնացող վտանգները, մինչդեռ սեփական իշխանությունը պահպանելու իրենց մոլուցքի մեջ, նրանք պատրաստ են ոտատակ տալ և Թուրքիայի կցորդի վերածել Հայաստանի Հանրապետությունը։ Փաշինյանը ցանկանում է ղեկավարել Հայաստանը, նույնիսկ եթե այն վերածվի Թուրքիայի վիլլայեթի։
Մանե Իսրայելյան
