Իրանը զորավարժություններ կանցկացնի այնտեղ, որտեղ հարկավոր է. ԻԻՀ պատգամավոր
ՄԻՋԱԶԳԱՅԻՆ
Իրանը զորավարժություններ կանցկացնի այնտեղ, որտեղ հարկ կհամարի, հայտարարել է Իրանի խորհրդարանի ազգային անվտանգության եւ արտաքին քաղաքականության հանձնաժողովի անդամ Հասան Հեմմատին՝ հավելելով, որ Իսլամական Հանրապետությունը չի ընդունի Հարավային Կովկասի սահմանների որեւէ փոփոխություն, փոխանցում է IRNA լրատվական գործակալությունը։
Մեկնաբանելով Իրանի հյուսիս-արեւմուտքում՝ Ադրբեջանի սահմանին գտնվող Իսլամական հեղափոխության պահապանների կորպուսի զորավարժությունները՝ նա նշել է, որ «այս զորավարժությունները ուժի ցուցադրություն էին, որի ուղերձը խաղաղություն եւ բարեկամություն է հարեւան պետությունների համար եւ վճռական պատասխան՝ սպառնացող ցանկացած սպառնալիքի»:
«Երկրի հյուսիսային սահմաններում տեղի ունեցող իրադարձությունները մեզ համար կարեւոր են, եւ անհրաժեշտության դեպքում մենք վարժանքներ ենք անցկացնում՝ պաշտպանելու երկրի իրավունքներն ու անվտանգությունը... Միջազգային ոչ մի օրենք թույլ չի տալիս սահմանների փոփոխություն տարածաշրջանի երկրներում. մենք կարծում ենք, որ յուրաքանչյուր երկիր ունի իր արժանապատվությունն ու դիրքը, եւ պետք է պահպանվի տարածաշրջանի բոլոր պետությունների տարածքային ամբողջականությունը»։
Իսլամական հեղափոխության պահապանների կորպուսի (ԻՀՊԿ) ցամաքային ուժերը մի քանի ստորաբաժանումների ներգրավմամբ լայնածավալ զորավարժություններ են անցկացրել Իրանի հյուսիսարեւմտյան սահմաններում։
Զորավարժությունների ընթացքում Իսլամական հեղափոխության պահապանների կորպուսի ցամաքային ուժերը փորձել են կառուցել պոնտոնային կամուրջներ եւ Ադրբեջանի հետ սահմանին հատել Արաքս գետը ։
Ծրագրեր են մշակվել նաեւ ուղղաթիռների գործողությունների եւ պարաշյուտային թռիչքների, գիշերային հարվածների, մարտական ուղղաթիռների, կամիկաձե անօդաչուների մասնակցությամբ առաքելությունների, ինչպես նաեւ հիպոթետիկ թշնամու կողմից վերահսկվող երթուղիների ու բարձունքների գրավման համար:
