«Եթե էկրանին չնայեի, կթվար՝ Ալիեւի ելույթն եմ լսում Միլի Մեջլիսում». ՀՀ երկրորդ նախագահի գրասենյակի համակարգող
ՔԱՂԱՔԱԿԱՆՈՒԹՅՈՒՆ
Դիվանագիտության պատմությունը մեկօրյա կեղծիքներով ճղճղոցները չի նկատում, այդ պատմության մեջ մնում են Մադրիդյան փաստաթղթի եւ Ստամբուլյան փաստաթղթի նման փառահեղ հաղթանակները եւ, ցավոք, կմնան նաեւ դավաճանական՝ արդեն ստորագրված, ստորագրվելիք եւ բանավոր պայմանավորվածություններով կրած ողբերգական պարտությունները: Այս մասին ասվում է ՀՀ երկրորդ նախագահի գրասենյակի համակարգող Բագրատ Միկոյանի մեկնաբանությունում ուղղված Նիկոլ Փաշինյանի այսօրվա ելույթին խորհրդարանում:
«Քստմնելի տեսարան էր: Եթե ելույթի ժամանակ էկրանին չնայեի, կթվար՝ Ալիեւի ելույթն եմ լսում Միլի Մեջլիսում:
«Սեփական կետից» բանակցություններ վարածը եւ այդ բանակցությունների պատմությունն ու տրամաբանությունը իր «դրական» եւ «կիրթ» գործընկեր Ալիեւից սերտածն ինքնամոռաց վերարտադրում էր նրա տեսակենտերը եւ մոտեցումները ՀՀ ԱԺ ամբիոնից: Գուցե ոգեւորվել էր Ալիեւին եւ Էրդողանին հանդիպելու սպասումից. կարծես նրանցից սերտած դասերի քննությունը հանձներ:
Արցախը բանակցություններից դուրս թողնելու, Ստամբուլյան խարտիայի եւ Մադրիդյան սկզբունքների մասին տեղեկատվությունն ամբողջությամբ հրապարակված է, պետք է առնվազն թուրքական տեսակետներ կրող լինել՝ այդ փաստերը թրքահաճո դարձնելով՝ նենգափոխելու համար:
Վերոհիշյալ փաստերը կհրապարակենք եւս մեկ անգամ՝ այս կեղծիքներն ավելի ցցուն դարձնելու համար:
Ի դեպ, Ադրբեջանը կտրուկ մերժել է Մադրիդյան փաստաթուղթը՝ համարելով այն խիստ պրոհայկական:
Դիվանագիտության պատմությունը մեկօրյա կեղծիքներով ճղճղոցները չի նկատում, այդ պատմության մեջ մնում են Մադրիդյան փաստաթղթի եւ Ստամբուլյան փաստաթղթի նման փառահեղ հաղթանակները եւ, ցավոք, կմնան նաեւ դավաճանական՝ արդեն ստորագրված, ստորագրվելիք եւ բանավոր պայմանավորվածություններով կրած ողբերգական պարտությունները»,- ասել է նա:
