Արդյո՞ք Հայաստանը կլքի ՀԱՊԿ-ը
ՔԱՂԱՔԱԿԱՆՈՒԹՅՈՒՆ
Politnavigator.net-ը գրում է, որ Երևանը պաշտոնապես դուրս չի գա ՀԱՊԿ-ից, բայց միևնույն ժամանակ նվազագույնի կհասցնի մասնակցությունն այդ կազմակերպությանը։
PolitNavigator-ի թղթակցին նման կարծիք է հայտնել Ռազմավարական հետազոտությունների և նախաձեռնությունների վերլուծական կենտրոնի ղեկավար Հայկ Խալաթյանը։
«Այս պահին Հայաստանի դուրս գալը ՀԱՊԿ-ից քիչ հավանական եմ համարում։ Բայց միևնույն ժամանակ, եթե նախկինում Ռուսաստանն ու Հայաստանը ՀԱՊԿ-ի ռազմական բաղադրիչի խորացման հիմնական նախաձեռնողներն էին, ապա այժմ Երևանը, ամենայն հավանականությամբ, կմասնակցի ՀԱՊԿ-ի գործունեությանը այնպես, ինչպես կազմակերպության որոշ այլ երկրներ»,- ասել է Խալաթյանը։
Միևնույն ժամանակ արևելագետ Լարիսա Ալեքսանյանը նշել է, որ ԱՄՆ-ի Կոնգրեսի Ներկայացուցիչների պալատի խոսնակի վերջին այցը Հայաստան նպատակ ուներ «Ռուսաստանին դուրս մղել տարածաշրջանից»։
«Դա Արևմուտքի հերթական փորձն է` սեպ խրել Հայաստանի և Ռուսաստանի հարաբերություններում։ Փելոսիի այցը ՀԱՊԿ-ում Հայաստանի լինելու կողմնակից հասարակությանը հիասթափեցրեց, ինչպես նաև երկրի ներսում որոշ արևմտամետ ուժերի ակտիվ քարոզչական աշխատանքի ֆոնին հանգեցրեց միամտորեն Արևմուտքից օգնության ակնկալիքով ՀԱՊԿ-ից դուրս գալու կոչերի ավելացմանը»,- ասել է քաղաքագետը։
Նրա խոսքով, նման կոչերի կողմնակիցները «պետք է հստակ գիտակցեն, որ Արևմուտքը Հայաստանի անվտանգությունն ապահովելու իրական մեխանիզմներ չի առաջարկում»։
«Արևմտյան երկրները չեն պատրաստվում միջամտել հակամարտությանը և նշանակալի օգնություն ցուցաբերել։ Նրանք միայն խոստումներ են տալիս Երևանին, որոնք մնալու են պերճախոս հայտարարությունների մակարդակում։ Կարծում եմ, որ, ի հեճուկս ամեն ինչի, Հայաստանի ղեկավարությունը չի գնա այնպիսի հապճեպ ու երկրի համար վտանգավոր քայլի, որը կհանգեցնի Հայաստանի համար ռազմաքաղաքական և տնտեսական լուրջ հետևանքների, և Երևանը դեմ առ դեմ կմնա Թուրքիային ու Ադրբեջանին առանց դաշնակիցների, քանի որ նրանց վերջնական նպատակներն ուղղված են հայկական պետականության ոչնչացմանը»,- ամփոփել է Ալեքսանյանը։
Նյութը հրապարակման պատրաստեց Կամո Խաչիկյանը
