Ադրբեջանական նարատիվներ և անթույլատրելի խոսույթ Փաշինյանի ելույթում՝ ՄԱԿ-ում

Հայաստանի վարչապետի պաշտոնը զբաղեցնող Նիկոլ Փաշինյանը երեկ ելույթ է ունեցել ՄԱԿ Գլխավոր ասամբլեայի 77-րդ նստաշրջանին։

Ինչպես և սպասելի էր Նիկոլ Փաշինյանը առաջ է մղել բացարձակապես ադրբեջանական նարատիվները, որևէ կերպ չպաշտպանելով ո՛չ Հայաստանի Հանրապետության շահերը, ո՛չ էլ Լեռնային Ղարաբաղի ժողովրդին։

Նախկինում միջազգային բոլոր մեծ միջոցառումների ժամանակ Հայաստանի ղեկավարների խոսքում կարմիր թելի պես անցնում էր Լեռնային Ղարաբաղի Հանրապետություն, Լեռնային Ղարաբաղի ժողովուրդ հասկացությունները։

Նիկոլ Փաշինյանի ելույթում Լեռնային Ղարաբաղին չափազանց կարճ տեղ էր հատկացված, ընդ որում Փաշինյանը չի օգտագործել «հանրապետություն» տերմինը, իսկ Լեռնային Ղարաբաղի ժողովուրդ արտահայտությունը վերափոխվել է «ԼՂ-ում բնակվող հայեր» արտահայտությամբ։ Ավելին, նա որևէ կերպ չի շեշտել Լեռնային Ղարաբաղի ժողովրդի ինքնորոշման իրավունքը, փոխարենը խոսել է միջազգային հանրության աջակցության, հետպատերազմյան վերականգնման, ինչպես նաև մշակութային ժառանգության պաշտպանության մասին։

Սա թերևս այն է, ինչ ցանկանում է հենց Ադրբեջանը, այսինքն նվազեցնել Լեռնային Ղարաբաղի սուբյեկտայնությունը միջազգային ասպարեզում հենց աշխարհի ամենաբարձր ամբիոնից, վնասել Լեռնային Ղարաբաղի կարգավորման խնդրին։ Չափազանց վատ անգլերենով Փաշինյանը կրկին շարունակել է իր «Խաղաղության օրակարգն» առաջ մղել՝ ընդ որում հերթական անգամ հակամարտության կարգավորումը կապելով «ժողովրդավարության» հետ, հայտարարել, թե Ադրբեջանի հարձակումը հարձակում էր Հայաստանի ժողովրդավարության դեմ։

Փաստն այն է, որ Հայաստանի գործող իշխանության առաջնորդը ՄԱԿ-ի ամբիոնից առաջ է մղում ոչ թե Հայաստանի Հանրապետության շահերը, այլ բացառապես թուրք-ադրբեջանական տանդեմի նարատիվները, ինչը հերթական անգամ վկայում է, որ օր առաջ պետք է իշխանությունից հեռացնել Նիկոլ Փաշինյանին և նրա վարչախմբին, այլապես հետևանքները անկանխատեսելի կլինեն։ Ի դեպ, նույն ելույթում Փաշինյանը կրկին առաջ է մղում Հայաստանի Հանրապետության 29800 քառակուսի կիլոմետր ճանաչված սահմանի հարցը, սակայն գրեթե չի անդրադառնում, որ Ադրբեջանը ներխուժել է Հայաստանի՝ միջազգային ճանաչված սահմաների մեջ, ոչ միայն սեպտեմբերյան սադրանքի ընթացքում, այլ նաև դրանից ավելի վաղ։

Փաշինյանի ելույթին անդրադարձել են նաև ճանաչված փորձագետներ։ Միջազգայնագետ Սուրեն Սարգսյանի խոսքով, ՄԱԿ-ում Փաշինյանն իր ելույթով երեք կարևոր իրողություն արձանագրեց, իշխանության «Խաղաղության դարաշրջանի» կոնցեպտը մեռելածին էր, իշխանությունը տապալել է Հայաստանի պաշտպանության կազմակերպումը, տապալել է դիվանագիտությունն ու բանակցային ողջ գործընթացը:

Պատգամավոր Տիգրան Աբրահամյանի գնահատմամբ էլ, ելույթը ցույց տվեց, որ Ադրբեջանը ընդլայնել է իր տարածքային և այլ պահանջները ու խնդիրը միայն միջանցքով, այսպես կոչված, անկլավներով, դեռ չասած՝ Արցախով, չի սահմանափակվում։

«Այս իշխանությունն իր պատերազմի դարաշրջանով երկիրը բերել հասցրել է մի կետի, երբ հայ ժողովուրդը պարզապես ընտրության հնարավորություն չունի, իսկ գոյաբանական պայքարը Հայաստանի կենսունակությանը անվերականգնելի հարված հասցնող զիջումների ու նոր ավերիչ պատերազմի միջև է»,- գրել է նա։

Նորայր Ալեքսանյան