Քծնանքի մաստեր կլաս՝ Նիկոլ Փաշինյանից
ՎԵՐԼՈՒԾՈՒԹՅՈՒՆՆԵՐ
Վլադիվաստոկում երեկ կայացել է Արևելյան տնտեսական ֆորումի լիագումար նիստը, որին մասնակցել են Ռուսաստանի նախագահ Վլադիմիր Պուտինը, Հայաստանի վարչապետ Նիկոլ Փաշինյանը և մի քանի այլ երկրների առաջնորդներ։
Ըստ էության, այդ նիստը վերածվել է քծնանքի երեկոյի, որտեղ իրական մաստեր կլասը ցույց է տվել Հայաստանի վարչապետ Նիկոլ Փաշինյանը։ Ընդսմին, նրա ամբողջ խոսքը կառուցված է եղել Վլադիմիր Պուտինին շնորհակալություն հայտնելու վրա, և Փաշինյանն ամեն ինչ արել է Ռուսաստանի գործող իշխանություններին համոզելու, թե հենց ինքն է միակն ու անկրկնելին, որի վրա կարող է Ռուսաստանը խաղադրույք անել Հայաստանում։
Մինչդեռ, Փաշինյանի խոսքում վտանգավոր մի քանի ելևէջներ կան, որոնք կարող են լրջագույն խնդիրներ հարուցել, մասնավորապես, թե՛ հայ-թուրքական հարաբերությունների կարգավորման և թե՛ հայ-ադրբեջանական հարաբերությունների կարգավորումը Փաշինյանը վերածել է Ռուսաստանի տիրապետության տակ գտնվող գործընթացների, հայտարարել, թե Թուրքիայի հետ հարաբերությունները կարող է կարգավորվել Ռուսաստանի միջնորդությամբ և հովանավորությամբ, նշել, թե Ռուսաստանի հետ սերտ համագործակցությամբ կհաջողվի տարածաշրջանում իրավիճակը պահել վերահսկողության տակ։
«Կան ուժեր, որոնք կարծում են՝ Ռուսաստանը չափազանց զբաղված է Ուկրաինայով և կարելի է օգտագործել իրավիճակն ապակայունացնելու համար»,- ասել է Փաշինյանը՝ փաստացի տակառ գլորելով ոչ միայն Ադրբեջանի, այլև արևմտյան երկրների հետ։
«Ռուսաստանը Հայաստանի անվտանգության գլխավոր գործոնն է»,- ոչ ավել, ոչ պակաս ընդգծել է Փաշինյանը։
Հարցին, արդյո՞ք չի վախենում, որ Արևմուտքի կողմից կարող են Հայաստանի նկատմամբ պատժամիջոցներ սահմանվել Ռուսաստանի հետ շփումների պատճառով, Փաշինյանը հայտարարել է. «Կարծում եմ վախենալն այնքան էլ օգտակար դիրքորոշում չէ, պետք է աշխատել կառավարելու առաջացող սպառնալիքները և փորձել ոչ միայն տեսնել սպասվող հնարավորությունները, այլ նաև աշխատել, որ այդ հնարավորությունները բացվեն»։
Ըստ էության, Փաշինյանի խոսքից Արևմտյան երկրները կարող են տպավորություն ստանալ, թե Հայաստանը օգնում է Ռուսաստանին շրջանցել արևմտյան պատժամիջոցները, իսկ թե ի՞նչ հետևանքներ դա կարող է ունենալ Հայաստանի վրա քաղաքական և տնտեսական առումով, խոսելն ավելորդ է: Իհարկե, Փաշինյանը տարբերակ չուներ Ռուսաստանին չքծնելու, սակայն դա կարող էր անել չափի մեջ և բավականին ողջամիտ, Հայաստանին վտանգի տակ չդնելու համար։
Թերևս պարզ է, որ Նիկոլ Փաշինյանը օգտագործում է բոլոր հնարավորությունները սեփական իշխանությունը ամրապնդելու համար և առանձնապես թքած ունի Հայաստանի կենսական շահերի վրա։
Հովհաննես Ասատրյան
