Հայ-ադրբեջանական շփումները գաղտնի են պահվում հանրությունից

Օգոստոսի 18-ի երեկոյան Բրյուսելում Հայաստանի անվտանգության խորհրդի քարտուղար Արմեն Գրիգորյանի և Ադրբեջանի նախագահի օգնական Հիգմեթ Հաջիևի հանդիպումից 3 օր է անցել, ո՛չ Հայաստանի կառավարությունը, ո՛չ էլ անվտանգության խորհրդի գրասենյակը որևէ տեղեկություն չեն հայտնել այդ հանդիպման մանրամասների մասին։ Առայժմ եղած միակ տեղեկությունը Հարավային Կովկասում Եվրամիության հատուկ ներկայացուցիչ Տոյվո Կլաարի թվիթերյան գրառումն է, որտեղ նա նշել էր, թե բավական արդյունավետ հանդիպում է կայացել։ 

Հայաստանի իշխանությունները շարունակում են ամեն գնով հանրությունից գաղտնի պահել նման առանցքային հանդիպումների մասին տեղեկատվությունը։ Հիշեցնենք, Ադրբեջանը տևական ժամանակ հրաժարվում էր հանդիպումների կազմակերպություններից, միտումնավոր սրում իրավիճակը շփման գծում՝ փորձելով Հայաստանի հայկական զինված ուժերին դուրս մղել Արցախի տարածքից։ Եվ այժմ բազմաթիվ քաղաքագետներ նշում են, թե Ադրբեջանին հաջողվել է այս փուլում ստանալ իր ցանկացած արդյունքը և դրանից հետո կրկին նստել է բանակցությունների նորանոր զիջումներ կորզելու Հայաստանից։

Այս ֆոնին բավականին ուշագրավ տեղեկություն են տարածել ադրբեջանական լրատվամիջոցները՝ նշելով, թե սեպտեմբերի 3-ին Մոսկվայում կայանալու է Հայաստանի, Ադրբեջանի և Ռուսաստանի ղեկավարների հանդիպումը։ Այս հանդիպման վերաբերյալ ևս որևէ տեղեկատվություն հայկական կողմը չի տարածում։

Ըստ էության, փաշինյանական վարչախմբի համար կարևորագույն և առանցքային նշանակություն է ստացել բոլոր տեսակի հանդիպումների մասին Հայաստանի և Արցախի հանրությանը անգիտության մեջ պահելու հանգամանքը։ Վարչախումբը գիտակցում է, որ այն ինչ ինքն անում է ապիկարություն և դավաճանություն է, ընդ որում բոլոր գործողություններն իրականացվում են միտումնավոր՝ առանց դյուզն-ինչ խղճի խայթի։

Աղավնոյում և Բերձորում 2 օր անց կլինեն արդեն ադրբեջանցիները, որոնք կվայելեն հայերի կառուցած և տասնամյակներով շենացրած տներն ու շինությունները։ Ռուսական խաղաղապահներն էլ հրշեջ մեքենաներ են բերել, որպեսզի հանկարծ, եթե որևէ մեկի մտքով անցնի հրդեհել իր տունը, արագ մարեն կրակը, ընդ որում հրշեջ մեքենաները ադրբեջանական են, բերվել են Ֆիզուլիի հրշեջ ծառայությունից։

Մինչ Հայաստանի և Արցախի բնակիչները փորձում են ատամները կրճտացնելով պայքարել ստեղծված իրավիճակի դեմ, փաշինյանական վարչախումբն ամեն ինչ անում է Հայաստանի և Արցախի շահերը ոտնահարելու՝ հանուն սեփական իշխանության կենսական նշանակության օբյեկտները Ադրբեջանին տալու իրենց զազրելի քաղաքականությանը։ 

Նորայր Հակոբյան