Հայ լրագրողը դիմել է բանականության օգնությանը. «Ինչքա՞ն կարելի է վիրավորել ռուսներին»
ՔԱՂԱՔԱԿԱՆՈՒԹՅՈՒՆ
Eadaily.com-ը գրում է, որ հայազգի հայտնի լրագրող, «Անի» հայկական հետազոտական կենտրոնի համակարգող Թաթուլ Հակոբյանը մտահոգություն է հայտնել Հայաստանում հակառուսական տրամադրությունների աճի կապակցությամբ։
«Մենք մի ամբողջ սերունդ ուղարկեցինք մեռնելու, և հիմա չգիտեմ, թե ինչի վրա ենք հույսերս դնում։ Մենք այդպես էլ չենք հասկացել, որ դաշնակիցներ չունենք: Իսկ ինչքա՞ն դեռ կարելի է ռուսներին վիրավորել։ Դե վիրավորեք ռուսներին։ Հարգելի ռուսներին վիրավորողներ, եթե նրանք հիմա թողնեն տարածաշրջանը, թողնեն Արցախ-Ադրբեջան շփման գիծը և միջանցքը (Լաչին), կարո՞ղ եք ասել, թե ինչպե՞ս եք պահելու այդ հատվածը։ Դուք պատասխան ունե՞ք դրա համար։ «Սկանդինավյան խաղաղապահնե՞ր» կբերեք։ Թե՞ Ֆրանսիայի զինված ուժերը։ Ինչքա՞ն կարելի է մարդկանց կերակրել նման պատրանքներով, նման ստերով։ Ինչպե՞ս է կարելի: Վարչապետ Փաշինյանը իր շուրջն է հավաքել հակառուսական առավելագույն հնարավոր ուժերը, և ի՞նչ է ստանում Հայաստանը դրանից։ Ես չգիտեմ։ Լավ, ասենք ռուսներ, վերադարձեք իրենց տուն։ Ինչպե՞ս ենք մենք պաշտպանելու այդ տարածքը։ Պաշտպանելու բան կա՞: Եթե կա, ինչո՞ւ ենք ռուսներին խնդրում ու աղաչում, որ գան այս վերջին կտորը պաշտպանեն, մեզ փրկեն», — ասել է նա սոցցանցի իր էջից ուղիղ եթերի ժամանակ։
Նրա խոսքով, Ադրբեջանը ներկայիս էսկալացիայի օգնությամբ փորձում է հասնել դեպի Նախիջեւան ինքնիշխան միջանցքի, որն իր կարգավիճակով նման է Լաչինի միջանցքին Հայաստանից Լեռնային Ղարաբաղ (Արցախ): Եվ այդ առումով նա նշել է, որ Հայաստանի և Արցախի իշխանությունները պետք է ազնիվ լինեն իրենց հանրապետությունների հասարակությունների հետ և ուղղակիորեն ասեն, որ հայկական կողմը «հիմա ուժ չունի ընդդիմանալու Բաքվի ծրագրերին կամ նշեն դրան ընդդիմանալու գինը»: Հակոբյանը նաև նշել է, որ ինքը դեռևս այն կարծիքին է, որ Երևանն ու Ստեփանակերտը պետք է առանց միջնորդների ուղիղ երկխոսություն հաստատեն Բաքվի հետ։
Թաթուլ Հակոբյանի ասածին հարկ է ավելացնել, որ Հայաստանում հակառուսական և ռուսաֆոբ քարոզչությունը երկար տարիներ համակարգվել և ակտիվորեն տարածվել է արևմտյան, այդ թվում՝ պետական, լրատվամիջոցների և բազմաթիվ դրամաշնորհային ծրագրերի օգնությամբ։
Նյութը հրապարակման պատրաստեց Կամո Խաչիկյանը
