Անատամ քաղաքականության հետևանքները

Հայաստանի վարչապետի աթոռը զբաղեցնող Նիկոլ Փաշինյանը երեկ վերջապես հայտնվեց հանրության աչքին և կառավարության նիստում սկսեց հաթաթա տալ ռուս խաղաղապահներին և Ռուսաստանին՝ մեղադրելով եռակողմ համաձայնությունների չկատարման մեջ։ Ավելին, Փաշինյանը հայտարարել է, եթե Լեռնային Ղարաբաղի շփման գծի անվտանգությունը եռակողմ ձևով չի ապահովվում, պետք է մտածել լրացուցիչ միջազգային մեխանիզմների գործարկման մասին։

Ըստ էության, Փաշինյանի այս հայտարարությունն ուղղված է ռուսական կողմին՝ ակնհայտ մեղադրանք էր ռուսներին։ Եվ հենց սա է պատճառը, որ այս հայտարարությունից հետո Ռուսաստանում անվտանգության խորհրդի նիստ է եղել, որի ընթացքում Վլադիմիր Պուտինը քննարկումներ է անցկացրել անվտանգության խորհրդի բարձրաստիճան պաշտոնյաների հետ։

Փաշինյանը իր այս հակառուսական քաղաքականությանը զուգահեռ երեկ նաև մի քանի հայտարարություններ է արել՝ ընդսմին չդատապարտելով Ադրբեջանի գործողությունները, ընդհակառակը, հայտարարել է, թե իրենց որևէ մեկը որևէ պլան չի ներկայացրել, որ պետք է դուրս գալ Լաչինի միջանցքից։ Ըստ էության, նա նաև նշել է, թե Լեռնային Ղարաբաղում Հայաստանի որևէ զինծառայող այլևս չկա։

«Եթե խաղաղապահ զորախումբը, Ադրբեջանը երաշխավորեն շփման գծի անձեռնմխելիությունը, Լեռնային Ղարաբաղի պաշտպանության բանակը մարտական հերթապահություն իրականացնելու անհրաժեշտություն չի ունենա»,- ասել է նա։

Թերևս այս անատամ պահվածքն է պատճառը, որ վերջին օրերին միջազգային մի ամբողջ շարք կազմակերպություններ, Եվրամիությունը, ԵԱՀԿ-ն, Միացյալ Նահանգները հայտարարություններ են տարածել Լեռնային Ղարաբաղում սրման վերաբերյալ, սակայն հասցեական որևէ դատապարտում Ադրբեջանի գործողությունների վերաբերյալ չկա։ Ընդսմին, Եվրամիությունը նույնիսկ Լեռնային Ղարաբաղ տերմինն է հրաժարվում օգտագործել, փոխարենն օգտագործում է շփման գիծ, Հարավային Կովկաս, Լաչինի միջանցք արտահայտությունները։

Այս ամենը վկայում է, որ միջազգային հանրությունը ևս հոգնել է Նիկոլ Փաշինյանի այս վարքից և ցանկանում է շուտափույթ՝ ի վնաս Հայաստանի և Արցախի, լուծել Լեռնային Ղարաբաղի հակամարտությունը և վերջապես ձեռք քաշել իրենց համար այդ «բեռից»։ Իսկ Փաշինյանը դեմ չէ խաղալ այդ կանոններով, միայն թե իրեն թողնեն մնա իշխանության ղեկին։ 

Տիգրան Առաքելյան