Իշխանական նոր սադրանք ընդդիմության դեմ. ինչպե՞ս են փորձում պառակտել

Մինչ խորհրդարանական ընդդիմությունը փորձում է վերջին օրերին համոզել հանրությանը, թե իրենց սխալ են հասկացել սեպտեմբերին Ազգային ժողով վերադառնալու մասին իրենց հայտարություններով և իրենք մտադիր են խորհրդարան վերադառնալ բացառապես իրենց օրակարգով, գործող իշխանությունները հերթական սադրանքն են նախապատրաստում ընդդիմության դեմ։

Թեև ամառ է, և գործող իշխանության ներկայացուցիչների մեծ մասը մեկնել է «վաստակած հանգստի», «Քաղաքացիական պայմանագրի» առանցքային դեմքերն այս օրերին զբաղված են` իշխանական սպասարկուների և քարոզչամիջոցների օգնությամբ ընդդիմության դեմ նոր դավեր նյութելով։

Մասնավորապես փորձում են հանրությանը համոզել, թե ընդդիմությունը մտադիր է, մեթոդներ է որոնում խորհրդարան վերադառնալու, սեփական դեմքը փրկելու առումով, ավելին, մեր տեղեկություններով փաշինյանական վարչախումբն ամեն ինչ փորձում է անել, որպեսզի առնվազն ընդդիմադիր երկու խմբակցությունների պատգամավորների մի խմբի համոզի վերադառնալ խորհրդարան։ Այս դեպքում մի ձեռքով երկու ձմերուկ կբռնեն, ոչ միայն ընդդիմության մի մասին կստիպեն վերադառնալ խորհրդարան, այդ կերպ եվրոպական կառույցներին ցույց տալով, թե իբր քաղաքական գործընթացները փողոցից վերադարձել են Ազգային ժողով, այլ նաև պառակտում կմտցնեն ընդդիմության շարքերում։

Ըստ էության, մեր աղբյուրների փոխանցմամբ, որոշակիորեն հաջողություն կարողացել է իշխանությունը գրանցել այս առումով, մի շարք պատգամավորներ ցանկություն են հայտնում վերադառնալ խորհրդարան և իշխանության դեմ պայքարը իբր մղել խորհրդարանական պատերի ներսում։

Այս օրերին ակտիվ քննարկումներ են ընթանում ընդդիմության մեջ, և շատերը պնդում են, թե փողոցում ձախողվելուց հետո ճիշտը Ազգային ժողով վերադառնալն է։ Մինչդեռ շատ ավելի արմատապես տրամադրված խումբը փաստարկում է, թե խորհրդարան վերադառնալով ընդդիմությունը նախ առաջինը կորցնելու է իր հեղինակության փշուրները, իսկ «Դիմադրության» շարժման ձախողումից հետո այլևս պետք է ոչ թե միայն մտածել Ազգային ժողով վերադառնալու, այլ նոր շարժում նախաձեռնելու՝ այդ կերպ իշխանության դեմ պայքարելու համար։

Հատկապես ընդդիմադիր առաջատար միավորները մտավախություն ունեն, որ այդ ձախողումից հետո, այլ քաղաքական ուժերի կհաջողվի լրացնել ընդդիմության վակումը և, հանրության մոտ ավելի արմատական տպավորություն թողնելով, կկարողանան իրենցից խլել առաջնության դափնիները։

Արեն Նիկողոսյան