Ադրբեջանը շարունակում է սպառնալ․ Ալիևը ռուսներին մեղադրում է ստելու մեջ
ՎԵՐԼՈՒԾՈՒԹՅՈՒՆՆԵՐ
Վրաստանի մայրաքաղաքում այսօր կայանալու է Հայաստանի և Ադրբեջանի արտգործնախարարներ Արարատ Միրզոյանի և Ջեյհուն Բայրամովի հանդիպումը։ ՀՀ ԱԳՆ մամուլի խոսնակ Վահան Հունանյանն է այդ մասին ասել, սակայն հանդիպման օրակարգի, քննարկվելիք հարցերի մասին որևէ տեղեկություն չի հայտնել։
Մինչ այդ Բաքվի բռնապետ Իլհամ Ալիևը շարունակում է հոխորտալ և սպառնալիքներ տեղալ Հայաստանի հասցեին, Ռուսաստանին էլ մեղադրել պայմանավորվածությունները չկատարելու մեջ։ Ադրբեջանի նախագահ Իլհամ Ալիևը հայտարարել է, որ ՌԴ Պաշտպանության նախարարության բարձրաստիճան ներկայացուցիչները խոստացել են մինչև հունիս ապահովել հայ զինվորականների դուրսբերումը Ղարաբաղից, սակայն այդ պայմանավորվածությունը մինչ օրս չի կատարվել։
«Հայաստանը, որպես պատերազմ տանուլ տված և կապիտուլյացիայի ակտ ստորագրած երկիր, 2020 թվականի նոյեմբերի 10-ի հայտարարությամբ ստանձնել է որոշակի պարտավորություններ։ Այդ պարտավորությունները հստակ են: Դրանցից մեկը Ղարաբաղից հայկական զինված ուժերի դուրսբերումն է։ Բայց մինչ օրս այդ հարցը լուծում չի գտել: Եթե Հայաստանը չի ցանկանում իր զորքերը դուրս բերել Ադրբեջանի տարածքից, ապա թող այդ մասին բացահայտ ասի, մենք կիմանանք, թե այդ դեպքում ինչ ենք անելու։ Ինչպիսի՞ն կլինի մեր պատասխանը»,- հայտարարել է Ալիևը:
Ադրբեջանցին իր խոսքում նաև ի միջի այլոց ասել է, թե հաջորդ ամիս նախատեսված է անցկացնել հայ-ադրբեջանական սահմանի սահմանազատման և սահմանագծման հարցով Հայաստանի և Ադրբեջանի հանձնաժողովների միջև երկրորդ հանդիպումը։
«Կարծում եմ, որ երկրորդ հանդիպումն արդեն գործնական հարցերի քննարկմանը նվիրված կլինի։ Բնական է, որ այս ձևաչափով համագործակցությունից մենք արագ արդյունք չենք ակնկալում, քանի որ դելիմիտացիան երկարատև գործընթաց է։ Բայց, համենայն դեպս, այդ գործընթացն սկսվել է, և մենք դա որպես դրական զարգացում ենք գնահատում»,- ասել է Ալիևը։
Ըստ էության, Ադրբեջանը շտապեցնում է Հայաստանին, պահանջում իր պայմանների կատարում, հընթացս էլ Ռուսաստանի հասցեին մեղադրանքներ հղում, որպեսզի զրկի խուսանավելու հնարավորությունից։
Շանտաժի այս քաղաքականությունը վտանգավոր նոր դրսևորումներ է ստանում, եթե հաշվի առնենք աշխարհաքաղաքական նոր իրողությունները, ինչպես նաև Ադրբեջանից առաջիկայում ահռելի քանակությամբ գազ և նավթ գնելու ԵՄ հանձնառությունը։
Բաքուն արյան ու փողի հոտ է առել, և կանգ չի առնելու ոչնչի առջև, ընդհուպ ՌԴ-ի հետ կապերը խզելու սպառնալիքները, Լեռնային Ղարաբաղից նախ հայ զինվորականներին, ապա ՌԴ խաղաղապահ զորախումբը հանելու իր մտադրությունը իրագործելու ճանապարհին։ Դե իսկ Հայաստանի գործող վարչախմբի մասին խոսելն անիմաստ է, Փաշինյանի իշխանությունը վաղուց դարձել է Ալիևի կլանի կցորդը և պատրաստ է կատարել նրա բոլոր քմահաճույքները։
Մանվել Ավետիսյան
