Հայ-թուրքական հարաբերությունների կարգավորումն արագացրել են

Հայ-թուրքական հարաբերությունների կարգավորման գործընթացը մեծ արագություն է ստացել։ Միացյալ Նահանգների պետքարտուղարությունն է իր աջակցությունը հայտնել հայ-թուրքական հարաբերությունների կարգավորմանը։ Նշվել է, թե ԱՄՆ-ն վճռականորեն աջակցում է կարգավորմանը, որը դրականորեն կանդրադառնա տարածաշրջանի վրա։

Միացյալ Նահանգները պատրաստակամ են աջակցել այս կարևոր երկխոսությանը այնպես, ինչպես երկու կողմերը կհամարեն պատշաճ:

Հիշեցնենք, վարչապետ Փաշինյանը հեռախոսազրույց էր ունեցել Ռեջեփ Թայիբ էրդողանի հետ, ինչը աննախադեպ է վերջին 10 տարվա քաղաքական զարգացումներում։

Թուրքիայում գտնվող հայերը, որոնք ավանդաբար թուրքական իշխանությունների վերահսկողության տակ են գտնվում, անմիջապես արձագանքեցին այս հեռախոսազրույցին, իսկ Թուրքիայի հայկական հիմնադրամների միությունը, որը Մևլյութ Չավուշօղլուի մտերիմ ընկերն է ղեկավարում, հաղորդագրություն է տարածել և հայտնել, թե հեռախոսազրույցը դարձել է Թուրքիայի հայ համայնքի հիմնական օրակարգային թեման, հույսով են հետևում զարգացումներին և սպասելիքներ ունեն։ Համայնքը կոչ է անում երկու երկրների բոլոր հատվածներին պատասխանատվության և ապագայի տեսլականով գործել:

Այսօր երկու այլ ուշագրավ իրադարձություն էլ տեղի ունեցավ։

Թուրքական լրատվամիջոցները հայտնում են, թե Հայաստան-Թուրքիա սահմանին ականազերծման աշխատանքներ են սկսվել։ Իսրայելական մի ընկերություն Կարսի Աքիական շրջանում արդեն 20 օր է, ինչ իրականացնում է այդ աշխատանքները, մասնավորապես օրակարգ է եկել ավտոմոբիլային և երկաթուղային ճանապարհներ ունեցող «Դողուքափը» և միայն ավտոճանապարհ ունեցող Ալիջան սահմանային անցակետերի բացման հարցը։

Պատգամավոր Լիլիթ Գալստյանն էլ հայտնել է, թե Ֆրանսիայի հարավում, Հայաստանի հանրության թիկունքում Հայաստանի իշխանությունը թուրքերի հետ հանգիստ բանակցություններ է վարում Թուրքիայում Հայաստանի հյուպատոսություն բացելու վերաբերյալ։

Նարեկ Կարապետյան