Ի՞նչ սպասել Freedom House-ի՝ վարչապետին ուղղված կոչից
ՀԱՍԱՐԱԿՈՒԹՅՈՒՆ
Freedom House իրավապաշտպան կազմակերպությունը կոչ է արել Հայաստանի վարչապետ Նիկոլ Փաշինյանին լրջորեն վերաբերվել ԶԼՄ-ների մտահոգություններին և օգտագործել ուղիղ կապի ուղիները, այդ թվում՝ բաց և թափանցիկ մամուլի ասուլիսների միջոցով՝ ապահովելու առողջ գործող ժողովրդավարություն։
«Հայաստանի իշխանությունները պետք է աջակցեն անկախ լրատվամիջոցներին և քաղաքացիական հասարակությանը՝ ակտիվ երկխոսություն վարելով նրանց և ժողովրդի հետ՝ հակազդելու ապատեղեկատվությանը, որը վտանգ է ներկայացնում Հայաստանի ժողովրդավարության համար երկրի համար կարևորագույն թեմաների շուրջ», - ասվում է կազմակերպության հաղորդագրությունում:
Երևանի մամուլի ակումբի նախագահ Բորիս Նավասարդյանը 1or.am-ի հետ զրույցում դժվարացավ հստակ ասել, թե այս կոչն ինչպիսի ազդեցություն կարող է ունենալ.
«Ինչ-որ առումով ինձ համար հասկանալի է՝ ինչու է ընտրված այս ձևաչափը, և այդ առումով ինչ-որ տեղ ըմբռնում եմ՝ ինչ նկատի ուներ վարչապետը, երբ ասում էր, որ չի ցանկանում, որ մամուլի ասուլիսները վերածվեն քաղաքական ակցիայի, մանավանդ, որ նման դեպքեր եղել: Բայց որպեսզի չլինի դժգոհություն առցանց մամուլի ասուլիսներից, անհրաժեշտ է, որ այն հարցերը, որոնք ներկայացվում են լրատվամիջոցների, հասարակական կազմակերպությունների կողմից, չենթարկվեն խտրականության և չձևափոխվեն, ինչի նախադեպերը նույնպես մենք ունենք:
Ես կարծում եմ, որ եթե չլիներ հարցերի աղավաղման, խեղաթյուրման պրակտիկան, միգուցե առցանց մամուլի ասուլիսներից այս դժգոությունը չէր առաջանա: Մյուս կողմից՝ շատ կարևոր է, որ առցանց մամուլի ասուլիսներն ավելի հաճախակի լինեն, որովհետև մենք 2018 թվականից սովորել են նրան, որ իշխանությունների ներկայացուցիչները շատ բաց էին լրատվամիջոցների առջև, հետո կամաց-կամաց փակվեցին, և այսօր շատ դժվար է և՛ հարցերի պատասխաններն ստանալ, և՛ տեղեկություններ ստանալ իշխանության ներկայացուցիչներից, մասնավորապես՝ վարչապետից: Կարծում եմ՝ եթե լրատվամիջոցների հետ բաց աշխատելն ապահովվի և մնա միևնույն ժամանակ առցանց ձևաչափը, միգուցե դժգոհությունները նույնպես կպակասեն: Եթե հարցերը համարժեքորեն ներկայացվեն, եթե լինեն այդ հարցերի համարժեք պատասխանները, այլ ոչ թե խուսափում հարցի էությունից, միգուցե առցանց մամուլի ասուլիսներն ավելի արդյունավետ կլինեն, քան եթե լինեն անմիջական կենդանի ասուլիսներ, որոնք կվերածվեն ինչ-որ սկանդալային միջոցառումների, որտեղ բովանդակային հարցերը կորչում են քաղաքական հայտարարությունների հոսքում»:
Հիշեցնենք, որ հունիսի 27-ին շուրջ 5 տասնյակ լրատվամիջոցներ հայտարարությամբ բոյկոտեցին վարչապետ Նիկոլ Փաշինյանի առցանց ասուլիսը և ոչ մի հարց ուղարկեցին վարչապետի աշխատակազմ։
Մարիամ Նալբանդյան
