Ո՞վ կլինի Ավինյանի մրցակիցը Երևանի ավագանու ընտրություններում
ՎԵՐԼՈՒԾՈՒԹՅՈՒՆՆԵՐ
Գործող իշխանությունները շարունակում են լրջորեն քննարկել Երևանի ավագանու արտահերթ ընտրություններ անցկացնելու հարցը։ Ամենայն հավանականությամբ Երևանի ավագանու ընտրությունները կկայանան արդեն սեպտեմբեր-հոկտեմբեր ամիսներին։ Իշխանության թեկնածուն, ինչպես ավելի վաղ նշել էինք, նախկին փոխվարչապետ Տիգրան Ավինյանն է։ Ընդ որում, մեր աղբյուրների փոխանցմամբ, իշխանությունը քննարկում է ոչ թե «Քաղաքացիական պայմանագրի» անունով ընտրություններին մասնակցելու, այլ որևէ անշառ անունով ընտրություններին գնալու հարցը։
Գիտակցելով, որ «Քաղաքացիական պայմանագիր» բրենդը, ինչպես նաև «Իմ քայլը» անվանումը կորցրել են իրենց հեղինակությունը, լրջորեն քննարկվում է ընտրություններին, օրինակ, «Ավինյան» դաշինք անվանումով մասնակցությունը։ Սա, ի դեպ, ձեռնտու է նաև Փաշինյանին, պարտության դեպքում մեղքը ոչ թե ՔՊ-ի, այլ պայմանական «Ավինյան» դաշինքի վրա բարդելու համար։
Ի տարբերություն իշխանության, որը կողմնորոշվել է, ընդդիմությունն առայժմ վերջնականապես չի կողմնորոշվել, թե ի՞նչ է անելու Երևանի ավագանու արտահերթ ընտրություններ նշանակվելու պարագայում։ Ընդ որում կարծիքները լրջորեն տարբերվում են, ընդդիմության մի մասը բացարձակապես դեմ է ավագանու արտահերթ ընտրություններին մասնակցելուն։ Շատերը նշում են, թե սա Նիկոլ Փաշինյանի օրակարգն է, դրանով ցանկանում է շեղել հանրության և ընդդիմադիր տրամադրված զանգվածի ուշադրությունը իր վրայից դեպի Երևանի ավագանու ընտրություններ։
Ընդդիմադիրների մի հատվածը նշում է, թե իմաստ չկա ռեսուրսները կենտրոնացնել Երևանի ավագանու ընտրությունների վրա, փոխարենը պետք է շարունակել փողոցով և այլ միջոցներով հասնել Նիկոլ Փաշինյանի հեռացմանը իշխանությունից, դրանից հետո նոր մտածել մյուս մակարդակներում իշխանությունը վերցնելու մասին։
Ընդդիմության մեկ այլ հատվածն էլ լրջորեն լոբբինգ է անում ընտրություններին մասնակցելու անհրաժեշտության հարցով։ Նշում են, թե սա լրացուցիչ հնարավորություն է ընդդիմության համար, իշխանության իրական վարկանիշն ու դերը հանրության մեջ ցույց տալու, հատկապես արտաքին ճնշումների պարագայում, ընդգծում են, թե սա հնարավորություն է ընդդիմադիր պայքարը լրջորեն ռեստարտ անելու համար։ Ընդ որում քննարկվում են մի քանի թեկնածուների անուններ, ովքեր կարող են մրցակից լինել իշխանական թեկնածուին։
Մասնավորապես ընդդիմության մեջ խոսվում է Ազգային ժողովի պատգամավորի մանդատից հրաժարված Արթուր Վանեցյանի հավակնությունների մասին՝ նկատելով, որ Վանեցյանը բավական լուրջ մրցակից կարող է լինել իշխանական թեկնածուին։
Մանվել Թադևոսյան
