Ընդդիմությունը՝ լուրջ վերափոխումների անհրաժեշտության առջև
ՎԵՐԼՈՒԾՈՒԹՅՈՒՆՆԵՐ
Դիմադրության շարժումը երեկ շտապ հավաք էր գումարել՝ Ապարանում տեղի ունեցած ողբերգական միջադեպի վերաբերյալ։ Ընդդիմադիրները մի քանի ժամում բազմահազար կողմնակիցներ էին հավաքել և երթով շարժվել «Քաղաքացիական պայմանագիր» կուսակցության, Ոստիկանության և Ազգային անվտանգության ծառայության շենքերի մոտ, իրենց բողոքի ձայնը բարձրացրել երկրում տիրող ամենաթողության մթնոլորտի կապակցությամբ։
Հաջորդ հանրահավաքն ընդդիմությունը գումարելու է արդեն հունիսի 24-ին, եթե ֆորս-մաժորային դեպքեր տեղի չունենան։ Այդուհանդերձ փաստենք, որ վերջին մեկուկես ամսվա ընթացքում ընդդիմադիր շարժմանն այդպես էլ չի հաջողվել լայն զանգվածների ներգրավել իրենց պայքարում, հանրության զգալի մասը գտնվում է ապատիայի մեջ և չի ցանկանում աջակցել ո՛չ իշխանությանը և ո՛չ էլ ընդդիմությանը։ Կարելի է նշել բազմաթիվ պատճառներ, թե ինչու է հանրությունը զերծ մնում սեփական իրավունքները պաշտպանելուց։ Սակայն առանցքային հարցերից մեկը ընդդիմության առաջարկած օրակարգն է։ Ըստ էության, ընդդիմությունը խնդիր ունի հստակ տեսլական ներկայացնելու հանրությանը, թե ինչպես է պատկերացնում զարգացումը՝ Նիկոլ Փաշինյանին իշխանությունից հեռացնելուց հետո։
Ընդդիմությունը նաև լուրջ ռեբրենդինգի կարիք ունի։ Պետք է մասնագետների միջոցով հասկանալ, թե որ հարցերն են առավելապես հուզում հանրությանը, որոնք են առաջնահերթ շահագրգռում մարդկանց և ինչպես կարելի է մեծացնել ընդդիմության հավաքների մասնակիցների ցանկը։ Այս պարագայում, երբ ընդդիմությանը չի հաջողվում հանրության լայն շերտերի ներգրավել և զգալ այդ հանրության զարկերակը, բնականաբար խնդիրներ են առաջանում նաև դիմադրության շարժման շարքերում։
Մամուլը վերջին օրերին գրում է, որ որոշ առանցքային գործիչներ մտադիր են հեռանալ դիմադրության շարժումից և նոր շարժումներ նախաձեռնել։ Իհարկե, որքան մեծ լինի ընդդիմադիր միավորումների թիվը ընդդեմ գործող իշխանությունների, այնքան ավելի մեծ ճակատ կբացվի փաշինյանական վարչախմբի դեմ։ Միաժամանակ այսպիսի պառակտվածությունը թույլ է տալիս իշխանություններին խոսել, որ ընդդիմությանը չի հաջողվում մարդկանց գրավել իրենց կողմը։ Վերանալով անձնական և կուսակցական ամբիցիաներից՝ ընդդիմությունը լուրջ վերափոխման կարիք ունի, այլապես Նիկոլ Փաշինյանին կհաջողվի ևս մի քանի տարի մնալ իշխանության ղեկին՝ հանրության տոտալ անտարբերության պայմաններում։
Գարիկ Ավետիսյան
