Սուր հակասություններ Կենտրոնական բանկի և Վահան Քերոբյանի միջև
ՎԵՐԼՈՒԾՈՒԹՅՈՒՆՆԵՐ
Հայաստանի կառավարության տնտեսական բլոկի և Կենտրոնական բանկի ջրերը մի առվով չեն հոսում, բանը հասել է էկոնոմիկայի նախարարության հետ կապված տելեգրամյան ալիքում և սոցիալական այլ կայքերում բանկային համակարգի նկատմամբ բացահայտ հակաքարոզչություն իրականացնելուն, իսկ էկոնոմիկայի նախարար Վահան Քերոբյանն իրեն թույլ է տալիս անհարգալից արտահայտություններ անել Կենտրոնական բանկի և նրա նախագահ Մարտին Գալստյանի հասցեին։
Էկոնոմիկայի նախարարության հետ առնչվող տելեգրամյան ալիքը, օրինակ, մի քանի գրառում է տարածել, որտեղ նշել է, թե խնդիրներ կան բանկերում հաշիվներ բացելու, Հայաստան տեղափոխված ՌԴ քաղաքացիներին սպասարկելու, բիզնեսի համար խնդիրներ ստեղծելու առումով։ Մեր աղբյուրների փոխանցմամբ, կառավարության տնտեսական բլոկի կողմից թիրախները դեպի ԿԲ-ն ու բանկերը ուղղելու պրակտիկան նոր չէ։ Իհարկե, որոշ դեպքերում քննադատությունն արդարացված կարելի է համարել, բայց պատճառը բնավ բիզնեսի և տնտեսության համար մտահոգված լինելը չէ, այլ էկոնոմիկայի նախարարության և նրա ղեկավարի անձնական հաշիվներն են։
Վահան Քերոբյանը տևական ժամանակ ստանձնել է փաշինյանական վարչախմբի շանթարգելի դերը, գերլավատեսական կանխատեսումներ է անում, ներքին լսարանին ուղղված հայտարարություններ տարածում երկնիշ տնտեսական աճի ու տնտեսության վերականգնման մասին, իսկ Կենտրոնական բանկն իր իրատեսական կանխատեսումներով սառը ջուր է լցնում Քերոբյանի կեղծ խանդավառության վրա։ ԿԲ-ի նախագահն էլ իր ասուլիսներում պարբերաբար քննադատում է Քերոբյանին, նշում, թե նրա կանխատեսումներն ու առաջարկները սխալ են՝ կտրված իրականությունից։
Օրեր առաջ ԿԲ-ի նախագահ Մարտին Գալստյանը սխալ էր համարել դրամն արժեզրկելու Քերոբյանի առաջարկը՝ այն վտանգավոր համարելով։ Գալստյանը նաև տնտեսական աճի իրատեսական կանխատեսում էր արել՝ 4,9 տոկոսի շրջանակներում։ Վահան Քերոբյանի արձագանքը նյարդային և անհարգալից էր։
Նախ նա հայտարարեց, թե համաձայն չէ ԿԲ-ի նախագահի կանխատեսման մեջ, ապա նույնիսկ նշեց, թե չի դիտել ասուլիսը։ Լրագրողի զարմանքին ի պատասխան էլ Քերոբյանն ասել է, թե իրենք չափազանց զբաղված են ամեն ինչ նայելու համար։ Կենտրոնական բանկը, ի տարբերություն ներքին լսարանի համար հայտարարություններ երկնող Քերոբյանի, աշխատում է Արժույթի միջազգային հիմնադրամի հետ, իսկ միջազգային կառույցները հրաշալի գիտեն, թե ինչ է կատարվում Հայաստանի տնտեսության մեջ։ Ուստի ԿԲ-ը չի կարող բացառապես Նիկոլ Փաշինյանին հաճոյանալու համար անհեթեթ և անիրական կանխատեսումներ անել։ Արդյունքում, միանգամայն արդարացի կերպով հիմար վիճակում է հայտնվում Վահան Քերոբյանը, բայց ասվածից հետևություններ անելու, կեղծ կանխատեսումներով չզբաղվելու փոխարեն քննադատում է ԿԲ-ին։ Տեսնենք, թե մինչև ուր կհասցնի նրան իր այս պահվածքը։
Ավետիք Մեսրոպյան
