Ալիևը սպառնում է, իսկ Հայաստանի իշխանությունը «բերանը ջուր է առել»

Ադրբեջանի նախագահ Իլհամ Ալիևը դարձյալ սպառնում է նոր առճակատումով։ Բաքվում երեկ տեղի է ունեցել «Գլոբալ 9-րդ ֆորումը», որի բացման ժամանակ Ադրբեջանի նախագահը հայտարարել է, թե Արցախի կարգավիճակի մասին չխոսելու բանավոր պայմանավորվածություն ունեն Հայաստանի հետ և Հայաստանի իշխանություններին կոչ է արել հրաժարվել Ադրբեջանին ուղղված ցանկացած տարածքային պահանջից՝ պնդելով, որ Ադրբեջանի կազմում Լեռնային Ղարաբաղ անունով վարչատարածքային միավոր չունի։ Ալիևը նաև նշել է, որ եթե Հայաստանը շարունակի կասկածի տակ դնել Ադրբեջանի տարածքային ամբողջականությունը, ապա Ադրբեջանը այլ ելք չի ունենա, քան անել նույնը։

Մասնավորապես նա հայտարարել է, թե Զանգեզուրը պատմական ադրբեջանական տարածք է եղել, որը Սովետական իշխանությունները 1920 թվականին փոխանցել են Հայաստանին։ Ըստ էության, Ադրբեջանի նախագահի այս հայտարարությունը նշանակում է, որ նա չի դադարում Սյունիքի նկատմամբ նկրտումներ ունենալ և անկեղծորեն հոխորտում և սպառնում է Հայաստանին նոր պատերազմով։ Ալիևը նաև նշել է, թե Հայաստանը պարտավոր է ապահովել անարգել կապը Նախիջևանի հետ և միջանցք տալ Ադրբեջանին։ Ադրբեջանի նախագահի այս հայտարարությունից հետո մինչ այս պահը որևէ արձագանք չի հետևել ո՛չ Հայաստանի վարչապետ Նիկոլ Փաշինյանից, ո՛չ էլ կառավարության այլ անդամներից։ Միակ պաշտոնյան, այն էլ ոչ Հայաստանից, այլ Արցախից, պետական նախարար Արտակ Բեգլարյանն է, որը հայտարարել է, թե Լեռնային Ղարաբաղ գոյություն չունի, որովհետև գոյություն ունի Լեռնային Ղարաբաղի Հանրապետություն, և դա միջազգային իրավունքի սուբյեկտ է, թեև պաշտոնապես միջազգայնորեն ճանաչված չէ։

Ըստ Բեգլարյանի՝ ադրբեջանաղարաբաղյան հակամարտությունը չի կարգավորվել և չի կարգավորվի այնքան ժամանակ, քանի դեռ Ադրբեջանը հաշվի չի առել Արցախի բնիկ ժողովրդի ինքնորոշման անկոտրուն իրավունքը։

«Միգուցե Ալիևը հիշի, թե ինչ է տեղի ունեցել Խորհրդային Ադրբեջանում ավելի քան 500 հազար հայերի հետ, թե Ադրբեջանի կողմից օկուպացված Արցախի տարածքներում կա՞ թեկուզ մեկ հայ»,- նշել է Արտակ Բեգլարյանը։

Հայաստանի իշխանությունները 44-օրյա պատերազմից հետո ընդհանրապես դադարել են արձագանքել Ալիևի հայտարարություններին։ Ընդամենը եվրոպական պաշտոնյաների հետ հանդիպումներում, մեկ-երկու կցկտուր բառ են արտահայտում Ադրբեջանի կողմից ռազմատենչ հռետորաբանության անթույլատրելիության մասին, սակայն նրանց «դուխը» որևէ կերպ չի հերիքում պատասխանել Իլհամ Ալիևին։ Հայաստանի իշխանությունները դարձել են ադրբեջանական օրակարգի սպասարկուներ, և որևէ հեռանկար նրանց հետ Հայաստանն ու Արցախը ունենալ չեն կարող։

Արարատ Դավթյան