Փաշինյանի հերթական խամաճիկին՝ գլխավոր դատախազի պաշտոն
ՎԵՐԼՈՒԾՈՒԹՅՈՒՆՆԵՐ
Երեկ վերջապես հաստատվեցին մամուլում տարածված տեղեկությունները, թե «Քաղաքացիական պայմանագիր» կուսակցությունը մտադիր է գլխավոր դատախազի թեկնածության համար առաջադրել Նիկոլ Փաշինյանի օգնական, Արդարադատության նախկին փոխնախարար՝ Աննա Վարդապետյանի թեկնածությունը։ Թեկնածուն ինքն էլ երեկ ներկայացել էր Ազգային ժողով՝ դռնփակ հանդիպմանը, պատգամավորներին ծանոթացրել իր կենսագրության հետ, խոստացել՝ աշխատել անաչառ։
Հարկ է նշել, որ Աննա Վարդապետյանի թեկնածության առաջադրումը ոչ միայն խնդրահարույց է դիտարկվում «Քաղաքացիական պայմանագիր» կուսակցության պատգամավորների շրջանում, այլև բուն դատախազությունում։ Իրավապահ համակարգը իսկական խուճապի մեջ է։ Վարդապետյանը, նշենք, հայտնի է որպես Ռուբեն Հայրապետյանի գործով քննիչին զանգահարած և հանձնարարականներ տված պաշտոնյա։ Դրանից հետո քրգործ հարուցվեց, բայց այն այդպես էլ դոփում է տեղում։ Ըստ երևույթին հենց այդ հանգամանքն է պատճառ դարձել, որ Նիկոլ Փաշինյանն այսօր նման խոցելի կերպարի է առաջադրում գլխավոր դատախազի պաշտոնում։
Սեպտեմբերին ավարտվում է Արթուր Դավթյանի պաշտոնավարման ժամկետը, նա այդ պաշտոնում նշանակվել էր դեռ Հանրապետականի օրոք, իսկ Նիկոլ Փաշինյանի ժամանակ թեև պահպանել էր իր պաշտոնը, սակայն որոշակի ինքնուրույնություն ուներ, քանի որ համարվում էր բավականին լուրջ իրավաբան։ Վարդապետյանը նույնիսկ ընդդիմադիր դաշտի իրավաբան ներկայացուցիչների գնահատմամբ, թեև համարվում է բավական լավ իրավաբան, սակայն զուրկ է ինքնուրույնությունից, իսկ խոցելի լինելու նրա հանգամանքը հնարավորություն է տալիս Փաշինյանին՝ օգտագործել Աննա Վարդապետյանին բոլոր կեղտոտ հանձնարարությունները կատարելու համար։
Դատախազության մեր աղբյուրների փոխանցմամբ, երեկվանից սկսած՝ լուրջ «աժիոտաժ» է սկսվել։ Մի շարք դատախազներ պարզապես հայտարարել են, որ դիմում կգրեն և կհեռանան համակարգից՝ հստակ հասկանալով, որ նոր գլխավոր դատախազի դեպքում իրենց լուրջ խնդիրներ են սպասվում։ Փաշինյանը նոր գլխավոր դատախազից, հատկապես ակնկալում է քաղաքական բռնաճնշումների և հետապնդումների սաստկացում ընդդիմադիրների դեմ, այդ կեղտոտ հանձնարարությանը երբեմն-երբեմն ընդդիմացող Արթուր Դավթյանից հետո վարչապետի օգնականի նշանակումը, վկայում է, որ գործող իշխանությունները որևէ բանի առջև կանգ չեն առնելու, իսկ հանրապետությունում հեղինակություն վայելող որևէ իրավաբանի փոխարեն նման կերպարի նշանակումը վկայում է, որ նախ «Քաղաքացիական պայմանագիր» կուսակցությունը չունի համապատասխան կադրային բազա, երկրորդն էլ՝ որևէ կերպ կաշկանդված չի լինելու իրավունքով և օրենքով։ Վարդապետյանը կատարելու է միայն Նիկոլ Փաշինյանի հրահանգները՝ դատախազությունը վերածելով լիակատար կցորդի։
Արեն Նիկողոսյան
