Հայաստանի ոստիկանությունը չի արձագանքել Ռուսաստանի Դաշնության ղեկավարին վիրավորած արմատականների ակցիային
ՔԱՂԱՔԱԿԱՆՈՒԹՅՈՒՆ
Rossaprimavera.ru-ն գրում է, որ Երևանում հակառուսական ցույց են անցկացրել արմատական «Ազգային դեմոկրատական բևեռ» կուսակցության կողմնակիցները։ Այդ կուսակցությունը նախկին «Սասնա ծռեր» շարժումն է, որի անդամները 2016 թվականին գրավել էին ոստիկանական բաժանմունքը և սպանել մի քանի իրավապահների։ Ակցիան անցկացվել էր ՌԴ ԱԳ նախարար Սերգեյ Լավրովի Հայաստան կատարած այցի օրը։
Հայաստանի մայրաքաղաքում գտնվող Գարեգին Նժդեհի հուշարձանից արմատական շարժման կողմնակիցները շարժվել են դեպի ՌԴ դեսպանատուն։ Ցուցարարները բղավել են հակառուսական կարգախոսներ և անպարկեշտ հայհոյանքներ ուղղել Ռուսաստանի նախագահին՝ ընդ որում դրանում ներգրավելով նաև երեխաներին։ Ականատեսների վկայությամբ ոստիկանները ցուցարարներին ձեռք չեն տվել, թեև ապրիլի վերջից սկսած ընդդիմության բողոքի ցույցերին ոստիկանությունը բազմիցս ուժ է կիրառել՝ ցրելով Հայաստանի վարչապետի հրաժարականը պահանջող խաղաղ ցուցարարներին։ Դեսպանատան մոտ կեսժամյա հավաքից հետո արմատականները ցրվել են։
Հիշեցնենք, որ 2021 թվականին Նիկոլ Փաշինյանի մերձավորներից մեկի՝ ԱԺ նախագահ Ալեն Սիմոնյանի նախաձեռնությամբ Հայաստանում ընդունվել է օրենք, որը խստացնում է պատասխանատվությունը վիրավորանքի և զրպարտության համար։ Սիմոնյանն այդ նախաձեռնությունն առաջարկել է այն բանից հետո, երբ 2020 թվականին հարձակվել է սոցիալական ակտիվիստ Արթուր Դանիելյանի վրա։
Թեև դեպքի տեսագրությունում ամեն ինչ երևում է, սակայն Սիմոնյանը խուսափել է պատժից, քանի որ, ըստ հետաքննության, «հոգեկան ծայրահեղ գրգռվածության» մեջ է եղել։ Սիմոնյանը սոցիալական ակտիվիստին մեղադրել է իր նկատմամբ «սեքսուալ բնույթի հայհոյանքներ» կիրառելու մեջ։ Արդյունքում Դանիելյանին մեղադրանք է առաջադրվել խուլիգանության համար։ Հիշեցնենք նաև, որ ինքը՝ Նիկոլ Փաշինյանը և իր թիմի անդամները, այդ թվում՝ խորհրդարանի նախագահ Ալեն Սիմոնյանը, ԱԳ նախարար Արարատ Միրզոյանը, մինչ իշխանության գալը կտրուկ հակառուսական դիրքորոշում էին որդեգրել։ Բացի այդ, 2018 թվականին Փաշինյանի իշխանության գալուց հետո բանտերից ազատ են արձակվել «Սասնա ծռեր» շարժման անդամները։
Խմբագրական մեկնաբանություն.
Երբ խոսքը գնում է Փաշինյանին և նրա համախոհներին վիրավորելու կամ զրպարտելու մասին, Հայաստանի իշխանությունները գործում են կոշտ և վճռական, իսկ նույնը կատարած իրենց ներկայացուցիչներին արդարացնելու համար օգտագործում են իրավաբանորեն կասկածելի արտահայտություններ, օրինակ՝ «հոգեկան ծայրահեղ գրգռում»։ 2022 թվականի մայիսին վարչապետի և կառավարության հրաժարականը պահանջող խաղաղ ցույցերի ժամանակ ոստիկանությունը բազմիցս ուժ է կիրառել ցուցարարների նկատմամբ։ Բայց երբ այն պետության ղեկավարին, ով Հայաստանի ռազմավարական դաշնակիցն է, փողոցում հրապարակային վիրավորում են՝ օգտագործելով անպարկեշտ արտահայտություններ, ընդհուպ օգտագործելով երեխաներին, դա չի արժանանում իրավապահների ուշադրությանը, չնայած վիրավորանքի մասին օրենքը երկրում վաղուց է ընդունված: Միևնույն ժամանակ, դա կատարում է հենց այն արմատական կազմակերպությունը, որին ոստիկանությունը պետք է տար իր գնահատականը 2016 թվականին իր գործընկերների սպանության պատճառով։ Պետք է լսել հայաստանյան ընդդիմության հայտարարությունները, որը բազմիցս հայտարարել է Հայաստանում գործող իշխող ռեժիմի հակառուսական էության մասին, որը, ըստ էության, միայն ստիպված է հագել «դաշնակցի» դիմակ։
Նյութը հրապարակման պատրաստեց Կամո Խաչիկյանը
