Բաղդասարով. Մենք շահագրգռված ենք, որ Հայաստանում իշխանության գան ռուսամետ ուժերը
ՔԱՂԱՔԱԿԱՆՈՒԹՅՈՒՆ
Sm.news-ը գրում է, որ այնպիսի ինտեգրացիոն գործընթացները, ինչպիսիք են ԵԱՏՄ-ն և ՀԱՊԿ-ը, այնքան էլ լավ չեն աշխատում։ Նման կարծիք է հայտնել քաղաքագետ, Մերձավոր Արևելքի և Կենտրոնական Ասիայի հիմնախնդիրների փորձագետ Սեմյոն Բաղդասարովը։
«Մենք ունենք դաշնակից, որը մաս է կազմում և՛ առաջին և՛ երկրորդ կազմակերպությանը, բայց դա չի խանգարում նրան սառեցնել իր տարածքում գտնվող ռուսական բանկերի մասնաճյուղերի գումարները (խոսքը Ղազախստանի մասին է) ... մեզ պետք է իսկական դաշինք ստեղծել»,- ասել է փորձագետը։ Բաղդասարովը սկսել է թվարկել այն երկրները որոնք կարող են ընդգրկվել նոր միության մեջ, խոսել է այն մասին, թե ինչ խնդիրներ կարող են առաջանալ։ Քաղաքագետը որպես օրինակ բերել է Բելառուսը. «Իրավիճակը Բելառուսում այնպիսին է, որ երկրի ղեկավարությունը, գիտակցելով սպասվող վտանգը, գնում է սերտ ինտեգրման, քանի որ միայն Մոսկվան կարող է պաշտպանական և արտաքին քաղաքականությունները համատեղել մեկ կենտրոնում»,- նշել է մասնագետը։
Բաղդասարովը նաև Հայաստանն է անվանել հնարավոր դաշնակից, բայց նա հավաքական պետություն ստեղծելու համար սահման չունի Ռուսաստանի հետ։ Միաժամանակ փորձագետը ընդգծել է, որ Հայաստանում ընդդիմության բողոքի ցույցերի ֆոնին ելույթով է հանդես եկել մի կին դեսպան ԱՄՆ-ից, ով ասել է, որ երկրում ամենաակնառու ժողովրդավարական վերափոխումները եղել են 2018 թվականին, երբ իշխանության է եկել Նիկոլ Փաշինյանը։ «Հայաստան մտնելու համար նախ պետք է հանել «վարդագույն ակնոցները» ու դեն նետել այն, այլ ոչ թե դավաճանության նմանվող անհեթեթություններ ասել, թե ներկայումս իշխանության մեջ գտնվող այդ գործիչները կողմնորոշված են դեպի Ռուսաստան։ Մենք շահագրգռված ենք, որ Հայաստանում լինի ռուսամետ իշխանություն, քանի որ պետք է այնտեղ ունենալ ռազմաբազաներ, պաշտպանել սահմանները»,- եզրափակել է փորձագետը։
Նյութը հրապարակման պատրաստեց Կամո Խաչիկյանը
