Հայաստանում զարմացած են ծխելու արգելքի պահպանմամբ

Rossaprimavera.ru-ն գրում է, որ Հայաստանում մարտի 15-ից մտցված ծխելու արգելքը զարմանալիորեն հարգվում է քաղաքացիների կողմից: Այդ մասին ասել է հանրապետության Առողջապահության ազգային ինստիտուտի տնօրեն Ալեքսանդր Բազարչյանը։ Ըստ Բազարչյանի այդ արգելքը կարող էր պահպանվել այնպես, ինչպես վերջերս պահպանվում է QR կոդերը ստուգելու պահանջը, բայց բոլորովին այլ կերպ է ստացվել։ Փորձագետը հիշեցրել է, որ մարտի 15-ից Հայաստանում ուժի մեջ է մտել ռեստորաններում և սրճարաններում թե՛ սովորական, թե՛ էլեկտրոնային ծխախոտի և այլ ծխախոտային արտադրանք ծխելու լիակատար արգելքը։ Իսկ ավելի վաղ՝ հունվարի 1-ից, սկսել էր գործել ցուցափեղկերում ծխախոտի արտադրանքի բաց տեղադրման և խանութներում դրանց գովազդի արգելքը։ Բազարչյանի խոսքով երկու դեպքում էլ այդ օրենքների խախտումները հատուկենտ են, ընդհանուր առմամբ քաղաքացիները պատրաստակամորեն են ընդունել դրանք։ Նա նշել է, որ որոշ քաղաքացիներ նույնիսկ որոշել են, որ փողոցներում կամ զբոսայգիներում ծխելը ևս չի թույլատրվում, թեև օրենքի պահանջները դրա վրա չեն տարածվում։ «Կյանքը ցույց տվեց, որ ծխողները մի քանի քայլով հանգիստ հեռանում են սրճարանից, ծխում ու վերադառնում։ Ես ինքս են տեսնում դա, քանի որ ոտքով աշխատանքի եմ գնում Կոմիտասի պողոտա կենտրոնով և Կասկադով, ինչպես նաև նույն կերպ վերադառնում եմ տուն»,- շեշտել է նա։

Փորձագետը նշել է, որ արգելքները կոչված են հանելու ծխողի դրական կերպարը։ «Ներդրվող արգելքների իմաստը նաև նրանում է, որ ծխելը չ​​ասոցացվի ինչ որ հաճելի բանի, ապրելակերպի հետ, և հետո այն դադարում է աչքի համար սովորական լինելուց»,- ասել է Բազարչյանը։ Փորձագետի կանխատեսմամբ եթե օրենքը շարունակի գործել լիարժեք, ապա առաջիկա երկու տարում կարելի է փոփոխություններ ակնկալել հանրային առողջության ոլորտում, իսկ 5-7 տարի հետո ծխելու հետ կապված խրոնիկ հիվանդությունների կրճատում կլինի։ Իսկ արդեն 10 տարի անց փոփոխություններն արմատական են լինելու, ամփոփել է Բազարչյանը։

Նյութը հրապարակման պատրաստեց Կամո Խաչիկյանը

www.1or.am