Փաշինյանական իշխանությունը՝ ընդդեմ մամուլի
ՎԵՐԼՈՒԾՈՒԹՅՈՒՆՆԵՐ
Ազգային ժողովի «Քաղաքացիական պայմանագիր» խմբակցության պատգամավորներ Արթուր Հովհաննիսյանն ու Լիլիթ Մինասյանը շրջանառության մեջ են դրել «Զանգվածային լրատվության մասին» օրենքում փոփոխություններ կատարելու մասին նախագիծը, որը ընդունվելու դեպքում հերթական մահակն է դառնալու փաշինյանական իշխանության ձեռքին՝ մամուլի դեմ հարաբերվելիս։ Մասնավորապես նախագծով առաջարկվում է պետական կառույցներին հնարավորություն տալ դադարեցնել լրագրողի կամ լրագրողների հավատարմագրումը։
Տասնամյակներ շարունակ Հայաստանում մամուլը որքան էլ փորձեին համոզել, թե ճնշումների և հետապնդումների է ենթարկվում, առնվազն պետական կառույցների հետ հարաբերվելու փուլում լուրջ խնդիրներ չեն ունեցել։ Թե՛ Ազգային ժողովում, թե՛ Կառավարությունում և այլ գերատեսչություններում կարողացել են ազատ ելումուտ անել, իրենց ուզած հարցերը տալ պետական պաշտոնյաներին, ստանալ հանրությանը հուզող պատասխաններն ու ներկայացնել։ 2018 թվականից հետո մեծամասամբ լրագրողներից բաղկացած գործող իշխանությունը, ընդհակառակը, որդեգրել է ազատ մամուլը ամեն գնով խեղդամահ անելու քաղաքականություն։
Բնավ զարմանալի չէ, որ «PARA TV»-ի նախկին թղթակից, ներկայումս Նիկոլ Փաշինյանի կուսակից Արթուր Հովհաննիսյանն է շրջանառության մեջ դնում հենց այսպիսի նախագիծ։ Զարմանալին հատկապես իրավապաշտպանների առանձին կառույցների արձագանքն է նման նախաձեռնությանը, միայն խոսքի ազատության պաշտպանության կոմիտեն է նշել, որ սա ակնհայտ հետընթաց է։ Մյուս բոլոր կառույցները, որոնք նույնիսկ մոծակի տզզոցի դեպքում միահամուռ ուժերով հայտարարություն էին տարածում, այս դեպքում ընդհանրապես զերծ են մնացել որևէ կերպ արձագանքելուց։
Լրատվամիջոցներն, իհարկե, կարող են դատարանների միջոցով փորձել վերականգնել իրենց հավատարմագրումը, սակայն դատական իշխանությանը սանձելու պարագայում, այս հանգամանքը ևս չափազանց բարդ է դառնալու։ Որքան էլ լրատվամիջոցները հայտարարեն, թե մինչև վերջ պայքարելու են այս օրենքի դեմ, փաստ է, որ փաշինյանական իշխանությունը որևէ բանի առաջ որոշել է կանգ չառնել և մինչև վերջ խեղդել ազատ մամուլը։ Իսկ լրագրողները, որոնք անցանկալի հարցեր են տալիս իշխանավորներին, այլևս կամայական որոշումներով հնարավորություն չեն ունենա հանրությանը հուզող խնդիրների վերաբերյալ հարցադրումներ հղել փաշինյանական իշխանության ներկայացուցիչներին։
Թաթուլ Դանիելյան
