Վարչախումբը քարոզչական նպատակով կօգտագործի Առուշանյանի ազատ արձակումը

Իննամսյա կալանքից հետո երեկ վերջապես դատարանի դահլիճից ազատ արձակվեց Գորիսի քաղաքապետ Առուշ Առուշանյանը։ Դատարանն արդարացրեց նրան ընտրական հանցագործությունների հոդվածներով։ Ընդսմին Գորիսի 31-ամյա քաղաքապետին մեղավոր ճանաչեցին պաշտոնեական լիազորությունները չարաշահելու, ինքնիրավչության և դիտավորությամբ առողջությանը վնաս պատճառելու համար։ Դատապարտեցին 6,5 ամիս ազատազրկման, բայց վճիռը պայմանական չկիրառեցին։ Դատավոր Գնել Գասպարյանի վճռում ամենատարօրինակը Գորիսի քաղաքապետին 5 տարով Տեղական ինքնակառավարման մարմիններում ղեկավար պաշտոն զբաղեցնելու իրավունքից զրկելն էր։

Փաշինյանական վարչակազմը հրաշալի հասկացավ, որ անիմաստ է տարիներ շարունակ անազատության մեջ պահել Առուշ Առուշանյանին, և կարելի է օգտագործել քրեական օրենսգրքում սպրդած սողանցքը և Առուշ Առուշանյանին զրկել քաղաքապետի պաշտոնից։ Եվ, ըստ էության, նրան ազատ արձակեցին դատարանի դահլիճից՝ ցույց տալով, որ իբր Հայաստանի դատական համակարգը պահպանում է իր անկախությունը և կարողանում է մերժել դատախազության միջնորդած 9,5 տարվա ազատազրկումը, փոխարենը, Գորիսի ամենաընդդիմադիր մարդուն զրկեցին 5 տարով պաշտոն զբաղեցնելու հնարավորությունից։ Ինքը՝ Առուշանյանը և նրա կողմնակիցները դատարանում ծափերով ողջունեցին դատարանի վճիռը, սակայն նշենք, որ առաջիկայում սա քաղաքական լուրջ գործընթացներով է պայմանավորված՝ Առուշանյանը զրկված է լինելու Գորիսում ընթացող քաղաքական լուրջ պրոցեսներին անմիջականորեն պաշտոնի բերումով մասնակցելուց և միայն կարող է օգտագործել սեփական հեղինակությունը։ Առուշ Առուշանյանը «Հայաստան» դաշինքում հաջորդն է ցուցակում, որ եթե որևէ պատգամավոր զրկվի մանդատից կամ հրաժարվի, Առուշ Առուշանյանը կդառնա ԱԺ պատգամավոր։ Այս վճիռը, իհարկե, չի տարածվի այդ հանգամանքի վրա։

Այդուհանդերձ, հստակ արձանագրենք, որ փաշինյանական իշխանությունը հրաշալի է տիրապետում բոլոր մանևրերին և կարողանում է նույնիսկ ամենասովորական և պարզ հետապնդումը, ինչպես նաև դատարանի կայացրած վճիռը, մեկնաբանել իր օգտին։ Ինչպես ասում են, ընդդիմությունը պետք է օրինակ վերցնի այդ առումով Փաշինյանից։ 

Մեսրոպ Խաչատրյան