Չեչնիայի իշխանություններն առաջարկում են ևս մեկ ճանապարհ կառուցել դեպի Վրաստան
ՄԻՋԱԶԳԱՅԻՆ
tass.ru-ն գրում է, որ Չեչնիայի իշխանություններն զբաղվում են Չեչնիայի տարածքով Ռուսաստանից դեպի Վրաստան երկրորդ ավտոմայրուղու կառուցման հարցով։ Նախագծի իրականացումը կնվազեցնի Անդրկովկասից ապրանքների առաքման արժեքը և ժամանակը: Այդ մասին լրագրողներին ասել է տարածաշրջանի տնտեսական, տարածքային զարգացման և առևտրի նախարար Ռուստամ Շապտուկաևը։ «Չեչնիայի Հանրապետության կառավարությունը համապատասխան նամակներ է ուղարկել դաշնային իշխանություններին: Այդ ճանապարհի կառուցումը, անկասկած, կնվազեցնի տրանսպորտային ծախսերը ապրանքներ Ռուսաստանից Հայաստան, Ադրբեջան, Իրան, Վրաստան և Թուրքիա առաքման ժամանակ»,- ասել է Շապտուկաևը։
Նրա խոսքով, ամենահեռանկարային երթուղին Չեչնիայի Հանրապետությունից դեպի Վրաստան Արգունի կիրճով արդեն գոյություն ունեցող Իթում-Կալի-Շաթիլի մայրուղին է, որը պահանջում է վերակառուցում և ընդլայնում: «Երբ ճանապարհը բերվի անհրաժեշտ գործառնական որակներով համապատասխան տեխնիկական վիճակի, այն կարելի է ներառվել Հյուսիս-Հարավ միջազգային տրանսպորտային միջանցքում: Համապատասխան տրանսպորտային և սոցիալական ենթակառուցվածքների ստեղծմամբ ճանապարհը կարող է օգտագործվել որպես Վրաստանի Ռազմավարական մայրուղու հավելում կամ այլընտրանք, որը կնպաստի Վրաստանի և Հայաստանի ուղղությամբ բեռնափոխադրումների շարունակականությանը»,- կարծիք է հայտնել նախարարը։
Նա նշել է, որ ճանապարհի կառուցումը բարենպաստ ազդեցություն կունենա Վեդուչի զբոսաշրջային-հանգստի համալիրի հատուկ տնտեսական գոտու զարգացման վրա։
«Մայրուղին կօգնի մեծացնել առևտուրը Վրաստանի և Ռուսաստանի միջև, խթան կհաղորդի Չեչնիայի Հանրապետության և Վրաստանի միջև սահմանային առևտրի զարգացմանը, համապատասխանաբար, զգալիորեն կմեծացնի Չեչնիայի Հանրապետության արտահանման ծավալները», - հավելել է Շապտուկաևը:
Մայրուղու շինարարությունը, որը Չեչնիայի բարձրլեռնային Իտում-Կալինսկի շրջանից տանում է Վրաստանի Ախմետովսկի շրջան, սկսվել էր դեռ հանրապետությունում առաջին ռազմական բախման ավարտից հետո, բայց վրացական կողմը ճանապարհի շինարարությունը սառեցրել է 1998 թվականին: Չեչնիայի ղեկավար Ռամզան Կադիրովը բազմիցս է հայտարարել, որ տարածաշրջանը պատրաստ է բացել այդ ճանապարհը, հենց որ Վրաստանի և Ռուսաստանի միջև պայմանավորվածություններ ձեռք բերվեն։
Նյութը հրապարակման պատրաստեց Կամո Խաչիկյանը
