Արցախի շուրջ իրադարձությունները զարգանում են կայծակնային արագությամբ
ՎԵՐԼՈՒԾՈՒԹՅՈՒՆՆԵՐ
Արցախի շուրջ իրադարձությունները գնալով ավելի վտանգավոր և անկանխատեսելի են դառնում․ օգտվելով ռուս-ուկրաինական պատերազմից՝ Ադրբեջանն անցել է մի կողմից՝ ամենօրյա սադրանքների իրականացման, մյուս կողմից՝ ճնշումներ է գործադրում՝ իր նպատակներին հասնելու համար։ Ադրբեջանի արտգործնախարար Ջեյհուն Բայրամովը հայտարարել է, թե Ադրբեջանը Հայաստանին է ուղարկել հարաբերությունների կարգավորման վերաբերյալ 5 կետից բաղկացած փաստաթուղթ և սպասում է պատասխանի։ Անթալիայի դիվանագիտական ֆորումին մասնակցող Բայրամովը թուրքական լրատվամիջոցներին հայտնել է, թե այդ առաջարկների թվում Հայաստանի ու Ադրբեջանի միջև սահմանազատմանն առնչվող դրույթ կա։
Ըստ նրա՝ գործընթացը սկսելու համար Հայաստանը պետք է հրաժարվի նախապայմաններ առաջ քաշելուց, ինչպես նաև պետք է ստեղծվի երկկողմ աշխատանքային խումբ։ Մյուս չորս առաջարկները Բայրամովը չի բարձրաձայնել։ Այս առաջարկների մասին ոչինչ չի հայտնել նաև Հայաստանի իշխանությունը։ Ընդհանրապես, Անթալիայի դիվանագիտական ֆորումն Ադրբեջանն օգտագործում է Հայաստանի իշխանություններին հրապարակային նվաստացնելու, նորանոր պահանջներ ներկայացնելու, քարոզչական զոնդաժի, միջազգային հանրությանն էլ Հայաստանին որպես ապակառուցողական դիրքորոշում ունեցող երկիր ներկայացնելու համար։ Ադրբեջանի փոխարտգործնախարար Խալաֆ Խալաֆովն էլ հայտարարել է, թե Հայաստանը պետք է Լեռնային Ղարաբաղից դուրս բերի «ապօրինի զինված խմբավորումները» (թշնամին նկատի ունի Արցախի ՊԲ-ն-հեղ․), նաև մեղադրել է Հայաստանին ստանձնած պարտավորությունները դանդաղ կատարելու մեջ։
Այս ամենին զուգահեռ Ադրբեջանը ամեն օր արկակոծում է Ասկերանի և Մարտունու շրջանների մի քանի գյուղեր, նաև բարձրախոսներով սպառնալիքներ են հնչեցնում բնակիչների հասցեին՝ փորձելով խուճապ տարածել։ Նախօրեին Արցախի խորհրդարանը արտահերթ նիստ էր գումարել, որտեղ Հայաստանի գործող վարչախմբին խնդրել էր ճանաչել Արցախի անկախությունը։ Փաշինյանական վարչակազմը այս խնդրանքին չի արձագանքել։ Ինչպես և չի արձագանքել Բայրամովի հայտարարությանը՝ հինգ կետերի վերաբերյալ։ Փոխարենը, ՀՀ ԱԳՆ մամուլի քարտուղար Վահան Հունանյանը հայտարարել է, թե քանի որ երկու երկրները ուղիղ բանակցությունների հարուստ փորձ չունեն, իսկ Ադրբեջանի հետ խաղաղության պայմանագրի ստորագրմանը պետք է նախորդի բանակցային գործընթաց, Հայաստանն առաջիկայում թերևս կդիմի ԵԱՀԿ միջնորդներին՝ Ադրբեջանի հետ խաղաղության բանակցություններ նախաձեռնելու հարցով: Որևէ այլ մանրամասն, Ադրբեջանի առաջարկ, կամ քննարկվող կետ փաշինյանական վարչակազմը չի հայտնում։ Եվ լավ էլ անում է: Ի վերջո, ընդդիմությունն ու քաղաքացիները ոտքի չեն կանգնում՝ կանխելու հերթական դավաճանական ակտը, չեն հեռացնում ապիկար և թուրքական օրակարգով շարժվող իշխանություններին, որոնք էլ վարվում են այնպես, ինչպես իրենց է հարմար։ Ուստի, բոլորն են պատասխանատու երկրի գլխին կանգնած հերթական սպառնալիքի համար։
Հակոբ Ավետիսյան
