Փաշինյանն է խրախուսում ներկուսակցական պառակտվածությունը ՔՊ-ում
ՎԵՐԼՈՒԾՈՒԹՅՈՒՆՆԵՐ
Ներկուսակցական խնդիրներ, խմբավորումներ և վիճաբանություններ լինում են գրեթե բոլոր կուսակցություններում, հատկապես Հայաստանում ցանկացած իշխող ուժ հաճախ բաժանվում է տարբեր խմբավորումների, որոնցից յուրաքանչյուրը հետապնդում է սեփական շահերն ու նպատակները, և դրանք հակադրվում են մյուս խմբավորման շահերին։ Սակայն այն ինչ կատարվում է իշխող Քաղաքացիական պայմանագիր կուսակցության հետ, վեր է ցանկացած տրամաբանությունից։ Նիկոլ Փաշինյանն ինքն է խրախուսում տարբեր խմբավորումների ստեղծումը, ներկուսակցական սկանդալները, միմյանց նկատմամբ հաշվեհարդարները և դրա համար Փաշինյանը օգտագործում է ոչ թե հրապարակային մեթոդներն ու քաղաքական խոսքը, այլ փակ «չաթերը»։
2018թ.-ի իշխանափոխությունից հետո Քաղաքացիական պայմանագիրը մի քանի ներքին «չաթ» ուներ, տարբեր քանակությամբ անդամներով, որտեղ քննարկում էին կուսակցության կարևորագույն խնդիրները։ Մեր աղբյուրի փոխանցմամբ ներկայումս այդպիսի մի քանի «չաթեր» են գործում, որոնցից ամենակարևորները Քաղաքացիական պայմանագիր կուսակցության վարչությանն է։ Ընդ որում հենց այստեղ սովորաբար առցանց ռեժիմով և տեսակապի միջոցով քննարկում են կարևորագույն խնդիրները, ինչպես նաև Քաղաքացիական պայմանագիր խմբակցության «չաթը», որտեղ էլ գործադիրը կամ Ազգային ժողովի ղեկավարությունը հանձնարարություններ են տալիս պատգամավորներին։
Նիկոլ Փաշինյանն, ընդհանրապես, իր իշխանության օրոք, թե՛ իր իշխանության, թե՛ նույնիսկ «Հայկական ժամանակ» թերթի խմբագիր լինելու ընթացքում, մշտապես օգտագործել է «բաժանիր, որ տիրես» մարտավարությունը։ Չկարողանալով բաժանել ընդդիմադիր ուժերին՝ Նիկոլ Փաշինյանը հասկացել է, որ սեփական իշխանությունը պահպանելու լավագույն մեթոդը սեփական կուսակցության մեջ համախմբվածություն և գաղափարների համադրում թույլ չտալն է։ Այդ նպատակով նա ինքն է խրախուսել, որպեսզի մի քանի խմբավորումներ ստեղծվեն՝ այսպես կոչված հեղափոխությունից անմիջապես հետո։ Իհարկե, դրան նպաստեց այն հանգամանքը, որ քաղաքական անդամների մեծ մասը չէր ճանաչում մեկը մյուսին և իրար հետ շփվելուց ունեին անձնական «դիսկոմֆորտ» նաև անվստահություն։
Ըստ էության, այսօր ստեղծվել է մի իրավիճակ, որ Փաշինյանն ինքը մնացել է հին քպ-ականների հույսին, որոնց առավել շատ է վստահում քան նոր կուսակիցներին։ Այդուհանդերձ նոր կուսակիցներին էլ օգտագործում է «հներին» կաշկանդելու, նրանց ախորժակը զսպելու հարցերում։ Օրեր առաջ Ազգային ժողովում Փաշինյանի մերձավոր շրջապատի անդամներից մեկի՝ շիշ բռնող մականունով Հայկ Սարգսյանի, և պաշտպանության ու անվտանգության հարցերի հանձնաժողովի նախագահ Անդրանիկ Քոչարյանի միջև տեղի ունեցած միջադեպը հենց սրա արտահայտությունն է։
Մեր աղբյուրի փոխանցմամբ, «Քաղաքացիական պայմանագրում» հրաշալի հասկացել են այս մարտավարությունը և այժմ փորձում են առավել մեծացնել սեփական խմբավորումները, գիտակցում են, որ ինչ-որ պահի եթե Նիկոլ Փաշինյանը ստիպված լինի զիջի իշխանությունը, իրենք որոշակի ուժ ներկայացնեն իրենցից, մեկը մյուսի նկատմամբ գերազանցություն ստանալու և իշխանությունը խլելու համար։ Մեր աղբյուրը հայտնեց, որ այդպիսի մի քանի խմբավորումներ են ստեղծվել, որոնք ղեկավարում են մի քանի հին քպ-ականներ և ևս մեկը, պայմանական ասած, տարեցների խումբը, ղեկավարում են Գուրգեն Արսենյանն ու Անդրանիկ Քոչարյանը։
Էդգար Սաֆարյան
