Պատերազմը՝ հնարավորություն նոր հարկատուներ ներգրավելու

Ռուս-ուկրաինական պատերազմի և արևմտյան պատժամիջոցների ֆոնին, ռուսաստանյան բազմաթիվ ընկերություններ և ռուսաստանցիներ ցանկանում են տեղափոխվել Հայաստան։ Պատերազմը, որքան էլ տարօրինակ հնչի, ոչ միայն մարտահրավեր ու սպառնալիք է, այլ նաև կարող է դառնալ հնարավորություն Հայաստանի համար։ Իհարկե, տնտեսական լուրջ խնդիրներ և ճնշումներ սպասվում է նաև Հայաստանի Հանրապետությանը և ՀՀ գործող իշխանությունները պարտավոր են անել հնարավոր բոլոր քայլերը ոչ միայն հարվածները մեղմելու, այլև նույնիսկ հնարավորության դեպքում լրացուցիչ շահույթ ստանալու համար։ Այս առումով բավական ուշագրավ դիրքորոշում են որդեգրել. Ռուսաստանում և Բելառուսում գրանցված ընկերություններին առաջարկում են փոխել իրենց տեղակայումը, վերագրանցվել Հայաստանում, որպեսզի կարողանան շփվել միջազգային հանրության հետ։

Էկոնոմիկայի նախարար Վահրամ Քերոբյանը, օրինակ՝ երեկ հայտարարել է, թե Ռուսաստանում տեղակայված բազմաթիվ ընկերություններ ցանկանում են գործունեությունը Հայաստանում շարունակել, իսկ մեկ տասնյակն արդեն Հայաստանում են։

«Մոտ մեկ տասնյակ ընկերություններ արդեն տեղափոխվել են, փաստացի, և մի քանի ընկերություններ էլ ճանապարհին են։ Ընդհանուր դիմել են բազմաթիվ ընկերություններ, կարելի է ասել հարյուրավոր»,- նշել է Վահրամ Քերոբյանը։

Տելեգրամյան ալիքներում նույնիսկ հատուկ խմբեր են բացվել, որտեղ իրավաբանական խորհրդակցություն են տալիս ռուս և բելառուս գործարարներին, թե ինչպես կարող են իրենց ընկերությունները տեղափոխել Հայաստան։ Տնտեսական առումով միգուցե այս քայլն արդարացված է, սակայն կա նաև դրա քաղաքական բաղադրիչը։ Ըստ էության թե՛ Բելառուսը, թե՛ Ռուսաստանը այս քայլը կարող են դիտարկել նաև որպես թշնամական գործողություն իրենց նկատմամբ։ Չէ՞ որ իրենք պատերազմի մեջ են, իսկ ՀԱՊԿ-ում իրենց քաղաքական դաշնակիցը զբաղված է հարկատուներին իր կողմը գրավելու գործողություններով։ Արդյո՞ք փաշինյանական վարչախումբը հաշվարկել է այս ամենի բոլոր հետևանքները, թե՝ ոչ, բարդ է ասել։

Արթուր Ներսիսյան