Մենք ունենք ինքնիշխանության ու մեր շահերի պաշտպանության լրջագույն խնդիր
ՔԱՂԱՔԱԿԱՆՈՒԹՅՈՒՆ
Բելառուսի նախագահ Ալեքսանդր Լուկաշենկոն Սոլովյովին տված հարցազրույցում ասել է, որ Հայաստանը փախչելու տեղ չունի և որ ի վերջո հայտնվելու է Մոսկվայի ու Մինսկի նախաձեռնած Միութենական պետության կազմում: Լուկաշենկոյի այս հայտարարությունը բուռն արձագանք ստացավ Հայաստանում:
Այս թեմայի մասին զրուցել ենք քաղաքագետ Արեգ Քոչինյանի հետ։
Հարցին, թե ինչո՞ւ է Բելառուսի նախագահը նման միտք հնչեցրել քաղաքագետն ասաց. «Բելառուսում տեղի ունեցած խայտառակ ընտրություններից ու դրանց արդյունքների կեղծումից հետո առաջացած բողոքի շարժումը դաժանաբար ճնշելուց հետո, ըստ էության, Լուկաշենկոն դուրս է եկել քաղաքակիրթ երկրների ղեկավարների շարքից ու ունի միայն մեկ նպատակ՝ ամեն հնարավոր ու անհնար առիթներով ապացուցել իր հավատարմությունը Ռուսաստանի նախագահին ու Ռուսաստանի շահերին: Այդ ճանապարհին, նա, բնականաբար, կանգ չի առնում: Սա ընդամենը պետք է դիտարկել որպես Ռուսաստանի նախագահին հաճոյանալու փորձ»:
Հարցին, թե պաշտոնական Երևանի արձագանքն ի՞նչ պետք է լինի այս հայտարարությանը՝ քաղաքագետն ասաց. «Նման միջադեպերն ընդհանրապես հնարավոր է դիտարկել ազգային ինքնասիրության համատեքստում, թույլ չտալ, որ մեզ վիրավորեն, բայց կոմիզմի ժանրից է դա պահանջել մի իշխանությունից, որը Ղարաբաղ է կորցրել ու պատերազմը տանուլ է տվել, այսինքն՝ ավելի մեծ ազգային ինքնասիրության ոտնահարում, քան այն, ինչ մեզ հետ տեղի է ունեցել, ուղղակի հնարավոր չէ պատկերացնել, մի բռնապետի ասածը դրա հետ համեմատած ուղղակի ոչինչ է: Խնդիրը ոչ թե Լուկաշենկոյի ասածն է, այլ այն, որ մենք ունենք ինքնիշխանության ու մեր շահերի պաշտպանության լրջագույն խնդիր»։
Սոնա Գիշյան
