Թուրքերը փորձում են ամրապնդվել Հայաստանում

Անցած օրերի թոհուբոհի մեջ գրեթե աննկատ մնաց արտառոց մի հայտարարություն, որ կառավարության նիստից հետո արել էր Էկոնոմիկայի նախարար Վահան Քերոբյանը։ Տխրահռչակ այս նախարարը, որ գործադիրում կատարում է նույն այն դերը, ինչ խորհրդարանում՝ Հովիկ Աղազարյանը, մեկնաբանել է վերջին շրջանում տարածված հայտարարությունները, թե թուրքերը Հայաստանում կապիտալ են ձեռքբերում։ Քերոբյանը հայտնել է, թե Հայաստանում թուրքերն անշարժ գույք ունեն։

«Միշտ եղել է, օրինակ` անշարժ գույք, ընկերություններ»,– ասել է Քերոբյանը՝ միաժամանակ տարօրինակ մի այլ արտահայտություն արել, թե այդ ցանկում ռազմավարական կարևոր օբյեկտներ չկան։ Էկոնոմիկայի նախարարը, ով տակավին վերջերս հանդես էր գալիս թուրքական ապրանքների էմբարգոյի օգտին, այսօր էլ հակառակ քարոզն է անում, նշում, թե Հայաստանի տնտեսությունը միշտ էլ բաց է եղել թուրքերի համար։ Էական հանգամանքն այն է, որ Հայաստանի գործող վարչախումբը որևէ խնդիր չի տեսնում, որ թուրքերը կարող են անշարժ գույք գնել Հայաստանում։ Եվ չկա որևէ մեկը, ով Քերոբյանին ու նրա վերադասներին բացատրի, որ անշարժ գույքն ինքն իրենով արդեն ռազմավարական կարևորություն ունի, ուստի չի կարելի թույլ տալ անշարժ գույքի անցումը թշնամի պետության ներկայացուցիչների ձեռքը։

Օրենքն, իհարկե, արգելում է հողերի վաճառքը օտարերկրացիներին, սակայն այն այնքան թերի է, որ գնորդը միշտ էլ սողանցքներ կարող է գտնել և դառնալ ոչ միայն հողատարածքի, անշարժ գույքի, այլև ռազմավարական նշանակության այլ օբյեկտների սեփականատերը։ Եվ կա ՀՀ իշխանություն, որը պարտավոր է կանխել նման դրսևորումները, ԱԱԾ-ն, որ պետք է ունենա բոլոր տեղեկությունները նման գործարքների մասին, համապատասխան կառույցներ, որոնք թույլ չտան թշնամու տնտեսական էքսպանսիան Հայաստան։ Թեպետ, ո՞ւմ ենք ինչ ասում․ գործող վարչախումբը ոչ միայն չի անելու դա, այլև ինքն էլ նպաստելու է թուրքերին Հայաստան բերելու, մեր երկիրը թշնամու կցորդ դարձնելու, Հայաստանը Աջարիայի վերածելու հարցում։

Ռոբերտ Հակոբյան