Նիկոլ Փաշինյանի «Երկրի հակառակ կողմը» գրքի ալբաներեն թարգմանության ծախսերը հոգացել է ԿԳՄՍ նախարարությունը
Կրթության, գիտության, մշակույթի և սպորտի (ԿԳՄՍ) նախարարության կայքում կա բաժին, ուր տեղադրված է «Թարգմանական ծրագրեր և աջակցություն ստեղծագործողներին ու հետազոտողներին» ծրագրով 2022 թ. դրամաշնորհ ստացողների ցանկը:
Դրամաշնորհ է տրվում հետևյալ մրցութային ուղղություններին համապատասխանող աշխատանքներին՝
ա) Ստեղծագործական աշխատանքներ
բ) Հետազոտական աշխատանքներ
գ) Թարգմանական աշխատանքներ
դ ) Հայ գրականությունը թարգմանություններում
2022թ. «Թարգմանական ծրագրեր և աջակցություն ստեղծագործողներին ու հետազոտողներին» միջոցառմամբ աջակցություն ստացող ֆիզիկական և իրավաբանական անձանց ցանկի «Հայ գրականությունը թարգմանություններում» ենթաբաժնում աջակցություն ստացող հեղինակները 10-ն են, այդ թվում՝ Ալեքսանդր Թոփչյան, Մկրտիչ Սարգսյան, Գուրգեն Խանջյան, Հովիկ Աֆյան, Գուրգեն Մահարի:
Ինչպես ուշադիր ընթերցողը կարող է նկատել, Նիկոլ Փաշինյանի «Երկրի հակառակ կողմը» գրվածքը ևս դրամաշնորհ ստացող գործերի շարքում է: Այն ալբաներեն թարգմանելու համար հատկացվել է 1.695.000 դրամ գումար:
Այսինքն՝ ՀՀ պետական բյուջեից «Երկրի հակառակ կողմը» գիրքը ալբաներեն թարգմանելու համար կհատկացվի բավականին պատկառելի գումար:
Հատկանշական է, որ 2020թ. ևս Նիկոլ Փաշինյանի գիրքն ընդգրկված է եղել դրամաշնորհ ստացող գործերի թվում, միայն թե այդ ժամանակ գումարը հատկացվել է գիրքը մակեդոներեն թարգմանելու համար:
«ՀՀ ԿԳՄՍ նախարարությունն իրականացնում է «Հայ գրականությունը թարգմանություններում» դրամաշնորհային ծրագիրը, որով աջակցում է արտերկրի այն հրատարակչություններին, որոնք ցանկանում են իրենց երկրում օտար լեզվով հրատարակել հայ դասական կամ ժամանակակից գրականություն:
Ծրագրի նպատակը հայ գրականությունն ու մշակույթը աշխարհին ճանաչելի դարձնելն է:
2019 թվականի ավարտին ձեռք բերված պայմանավորվածությունների համաձայն` 2020 թվականին կհրատարակվի 16 գիրք` 12 լեզվով»,- կարդում ենք 2020թ. հունվարի 23-ին ԿԳՄՍ կայքում տեղադրված հաղորդագրության մեջ: 16 գրքերի թվում, ի թիվս Հովհաննես Թումանյանի, Րաֆֆու, Ֆրանց Վերֆելի գործերի ու Կոմիտասի նամակների, իր «պատվավոր» տեղն ունի նաև Նիկոլ Փաշինյանի «Երկրի հակառակ կողմը» գիրքը:
Դեռևս հայտնի չէ, թե պետական բյուջեից որքան և որ նախարարությունն է հոգալու Փաշինյանի այդ գրքի հրատարակման ծախսերը:
Այնուամենայնիվ, մենք այդ կապակցությամբ գրավոր հարցումներ ենք ուղարկել Ալբանիայի նախագահին և Հյուսիսային Մակեդոնիայի Հանրապետության վարչապետին: Ալբանիայի նախագահ Իլիր Մետային ուղղված հարցում-նամակում ասվում է.
«Հայաստանի Հանրապետության վարչապետի աթոռը զբաղեցնող Նիկոլ Փաշինյանի «Երկրի հակառակ կողմը» գրքի ալբաներեն թարգմանության համար ՀՀ Կրթության, գիտության, մշակույթի և սպորտի (ԿԳՄՍ) նախարարությունը դրամաշնորհ է հատկացրել՝ շուրջ 3 000 եվրո գումարի չափով:
Այս առնչությամբ խնդրում ենք պատասխանել հետևյալ հարցերին՝
1. Արդյո՞ք Ալբանիայում մեծ է գիրքն ալբաներենով ունենալու պահանջարկը:
2. Ո՞ր երկրի կառավարությունն է հոգալու գրքի ալբաներեն հրատարակության ծախսերը»:
Հարցումն ուղարկվել է նաև Հյուսիսային Մակեդոնիայի Հանրապետության վարչապետին: Ի դեպ, Մակեդոնիայի նախագահ Ստևո Պենդարովսկու հետ Նիկոլ Փաշինյանը 2020թ. փետրվարին հանդիպում էր ունեցել:
Հյուսիսային Մակեդոնիայի վարչապետից ևս փորձել ենք ճշտել՝
«Հայաստանի Հանրապետության վարչապետի աթոռը զբաղեցնող Նիկոլ Փաշինյանի «Երկրի հակառակ կողմը» գրքի մակեդոներեն թարգմանության համար ՀՀ Կրթության, գիտության, մշակույթի և սպորտի (ԿԳՄՍ) նախարարությունը 2020թ. դրամաշնորհ է հատկացրել:
Այս առնչությամբ խնդրում ենք պատասխանել հետևյալ հարցերին՝
1. Արդյո՞ք Մակեդոնիայում մեծ է գրքի մակեդոներեն տարբերակի պահանջարկը:
2. Ո՞ր երկրի կառավարությունն է հոգացել գրքի մակեդոներեն հրատարակության ծախսերը:
3. Արդյո՞ք կա վիճակագրություն գրքի վաճառքի ծավալների վերաբերյալ»:
Պատասխան նամակները ստանալուն պես կհրապարակենք դրանք:
