Վարչապետ Ասադովը զեկուցել է Ադրբեջանի ռազմական հզորության մասին. «Իմաստուն քաղաքականության շնորհիվ»
ՀԱՍԱՐԱԿՈՒԹՅՈՒՆ
eadaily.com-ը գրում է, որ ըստ միջազգային վարկանիշների ադրբեջանական բանակն աշխարհի 40 ամենահզոր և մարտունակ զինված ուժերի շարքում է։ Այս մասին ասել է Ադրբեջանի վարչապետ Ալի Ասադովը ամփոփելով անցնող տարվա արդյունքները։
Տնտեսական ներուժի զարգացման ուղղություններից մեկը, որը «անընդհատ հարստացվում է նախագահ Իլհամ Ալիևի իմաստուն և հեռատես քաղաքականության շնորհիվ», երկրի պաշտպանունակության բարձրացումն է, ասել է կառավարության ղեկավարը։ «Հարկ է նաև ընդգծել, որ Ադրբեջանում ժամանակակից պահանջներին համապատասխանող պաշտպանական և ռազմարդյունաբերական համալիր ստեղծելու նախաձեռնությունը պատկանում է նախագահ Իլհամ Ալիևին», - նշել է կառավարության ղեկավարը։ Նրա խոսքով, այդ ոլորտում ձեռքբերումները կարևոր դեր են խաղացել 2020 թվականի աշնանը Ղարաբաղում «44-օրյա պատերազմի ընթացքում ադրբեջանական բանակը բարձր մակարդակի զինամթերքով զինելու գործում»։ «Ադրբեջանը հասել է ռազմարդյունաբերական համալիրի կայուն զարգացման։ Ներկայումս (հայրենական) ռազմարդյունաբերական համալիրի արտադրանքն արտահանվում է ավելի քան 30 երկիր։ Եթե 2003-2004 թվականներին պետբյուջեից միայն 0,9 մլրդ մանաթ է հատկացվել պաշտպանական ծախսերին, ապա 2020 թվականին այդ ցուցանիշը հասցվել է 3,9 մլրդ մանաթի։ Հաջորդ տարի ավելի քան 4,5 միլիարդ մանաթ (2,65 միլիարդ դոլար ընթացիկ փոխարժեքով) պետական բյուջեից կհատկացվի պաշտպանության և ազգային անվտանգության համար»,- ասել է Ասադովը։
Նյութը հրապարակման պատրաստեց Կամո Խաչիկյանը
