Ինչպե՞ս մանիպուլացնել Բայդենի ստորագրած օրենքը․ Փաշինյանական քարոզչամեքենայի նոր կեղծիքը

ԱՄՆ նախագահ Ջո Բայդենը նախօրեին ստորագրել է Ազգային պաշտպանության օրենքը (NDAA) 2022թ. համար, որով նախատեսում է 770 միլիարդ դոլարի հատկացում պաշտպանական կարիքների համար։ Օրենքում ընդգրկվել են նաև հայամետ կոնգրեսականների ներկայացրած ուղղումները, որոնք առնչվում են Թուրքիային և Ադրբեջանին։

Ներկայացուցիչների պալատի անդամ Ֆրանկ Փալոնն իր թվիթերյան էջում գրառում է արել` ասելով, որ ազգային պաշտպանության մասին օրենքը, որը ստորագրեց Բայդենը, կարևոր դրույթներ է ներառում, որոնք ուղղված են Ադրբեջանին և Թուրքիային պատասխանատվության ենթարկելուն Արցախում կատարած ռազմական հանցագործությունների համար:

«Ես կհետևեմ, որ պահանջվող զեկույցները ճշգրիտ լինեն այդ հանցագործությունները փաստագրելիս»,–գրել է Փալոնը։ Հայամետ լոբբիստի այս հայտարարությունն ինքնին կարևոր է, որքան կարևոր է նաև օրենքում ընդգրկված դրույթները։ Սակայն դրանք ոչ ավելին են, քան սովորական քարոզչական հնարք, և առանձնապես լուրջ փոփոխությունների չեն հանգեցնելու ամերիկյան քաղաքականության մեջ։ Իհարկե, փաշինյանական քարոզչամեքենան երեկվանից սկսած հիացական ճիչեր է արձակում սոցիալական ցանցերում և հեռուստաեթերներում, հանրությանն էլ փորձում են ներկայացնել, թե մի «ցնցող» ու «շենշող» իրադարձություն է եղել։

Օրենքի 1302-րդ հոդվածով նախատեսված է, որ դաշնային կառավարությունը պարտավոր է 180 օրվա ընթացքում Կոնգրեսին զեկույց ներկայացնել հայ-ադրբեջանական պատերազմի մասին: Միաժամանակ, այս օրենքով ամրագրված է 2020թ. նոյեմբերի 9-ի համաձայնագրերի կատարման անհրաժեշտությունը և կա «ռազմագերիների վերադարձ» ձևակերպումը: Կոնգրեսին պետք է նաև ներկայացվեն տեղեկություններ արտաքին ուժերի ներգրավվածության մասին:

Ամերիկագետ Սուրեն Սարգսյանը նշում է, թե օրենքով որևէ պատժամիջոց կամ պատժիչ գործողություն նախատեսված չէ: Ավելին, 907-րդ բանաձևին վերաբերող դրույթը այդպես էլ հայկական կողմի լոբբիստները չկարողացան անցկացնել այս օրենքում, քանի որ միայնակ էին թուրք-ադրբեջանական տանդեմի դեմ պայքարում: «Մենք այս օրենքը կարող ենք կիրառել քարոզչական տեսանկյունից, եթե իհարկե ունենք թուրքական և ադրբեջանական քարոզչությանը հակակշռելու ցանկություն»,- նշել է Սուրեն Սարգսյանը։

Հայաստանի իշխանությունները սեփական ժողովրդին մանիպուլացնելու և խաբելու փոխարեն ավելի ճիշտ կանեն ակտիվացնեն ջանքերը ԱՄՆ-ում և այլ երկրներում՝ հայկական շահերն առաջ մղելու ուղղությամբ։


Կարեն Սիմոնյան